Աշխարհի ամենահին կամերային անսամբլներից մեկի՝ Borodin Quartet-ը համերգը տեղի կունենա հոկտեմբերի 7-ին, ժամը 19:30-ին, Արամ Խաչատրյանի անվան համերգասրահում, հայտնում է Հայաստանի ազգային ֆիլհարմոնիկ նվագախումբը։ Ելույթը կկայանա 17-րդ երևանյան միջազգային երաժշտական փառատոնի շրջանակներում։
Ավելի քան 75 տարվա պատմություն ունեցող այս լեգենդար քառյակը միջազգային բեմերում առանձնանում է տեխնիկական կատարելությամբ և նուրբ մեկնաբանություններով։ Նրանց համերգները համարվում են անզուգական փորձառություն՝ միավորելով խորը երաժշտական կատարումներ և կատարյալ ներդաշնակությունը։
Համերգի տոմսերի արժեքը 5-ից 20 հազար դրամ է։
Borodin Quartet-ն աշխարհի ամենահին և ամենատիտղոսակիր կամերային անսամբլներից մեկն է։ Այն հիմնադրվել է 1945 թվականին Մոսկվայի կոնսերվատորիայում, իսկ 1955 թվականից կրում է Ալեքսանդր Բորոդինի անունը։ Տարիների ընթացքում անսամբլում ելույթ են ունեցել ականավոր երաժիշտներ, այդ թվում՝ Մստիսլավ Ռոստրոպովիչը, Ռուդոլֆ Բարշայը, Միխայիլ Կոպելմանը, Ռուբեն Ահարոնյանը։
Անսամբլն ավելի քան 30 տարի համագործակցել է Դմիտրի Շոստակովիչի հետ, ինչպես նաև ելույթ է ունեցել Սվյատոսլավ Ռիխտերի, Դավիթ Օյստրախի, Յուրի Բաշմետի, Էլիսո Վիրսալաձեի, Միխայիլ Պլետնևի և այլոց հետ։ Երգացանկում ներառված են Բեթհովենի, Շոստակովիչի, Պրոկոֆևի, Բրիտտենի, Շնիտկեի և ժամանակակից կոմպոզիտորների ստեղծագործություններ։
Անսամբլը տվել է մոտ 7000 համերգ ամբողջ աշխարհում, ձայնագրել է ավելի քան 100 ստեղծագործություն, այդ թվում՝ Բեթհովենի և Շոստակովիչի քառյակների ամբողջական շարքեր։ Քառյակը ԽՍՀՄ և Ռուսաստանի Դաշնության պետական մրցանակների, Շոստակովիչի մրցանակի (Գերմանիա) դափնեկիր է և գրանցված է Գինեսի ռեկորդների գրքում՝ ստեղծագործական երկարակեցության համար։
Ներկայիս կազմում են Նիկոլայ Սաչենկոն, Սերգեյ Լոմովսկին, Իգոր Նայդինը և Վլադիմիր Բալշինը։
