Դիտում ՝ 23 205
Ամերկացի դիվանագետը հինգշաբթի ներողություն է խնդրել այս շաբաթվա սկզբին Լիբանանում տեղի ունեցած մամուլի ասուլիսի ժամանակ լրագրողների խմբին լռեցնելու համար «անասունի նման» եզրույթն օգտագործելու համար, հաղորդում է Associated Press-ը։
Բարաքը երեքշաբթի ԱՄՆ պաշտոնյաների պատվիրակության հետ մեկնել է Բեյրութ՝ քննարկելու Լիբանանի կառավարության ջանքերը՝ «Հըզբոլլահ»-ին զինաթափելու և հրադադարի ռեժիմը հաստատելու համար։
Նախագահական պալատում մամուլի ասուլիսի սկզբում լրագրողները պահանջել են, որ Բարաքը բարձրանա ամբիոն, երբ նա սկսել է խոսել սենյակի մեկ այլ տեղից։ Ամբիոն բարձրանալուց հետո Բարաքը դիմել է լրագրողների բազմությանը։
Երեքշաբթի օրը բարձրաստիճան դիվանագետը քննադատության է ենթարկվել Լիբանանի նախագահական պալատում կայացած մամուլի ասուլիսի ժամանակ լիբանանցի լրագրողներին արված կոչից հետո, որի ժամանակ նա ասել էր «Մի՛ պահեք ձեզ անասունի նման»։ Թոմ Բարաքը այս հայտարարությունը արել է նախագահ Ջոզեֆ Աունի հետ հանդիպումից հետո։
«Խնդրում եմ մեկ րոպե լռեք… Հենց որ սա սկսի քաոսային դառնալ, ինչպես կենդանիների մոտ, մենք կհեռանանք», — ասել է Բարաքը մամուլի ասուլիսի ժամանակ ամբիոնից։ «Այսինքն՝ դուք ուզում եք իմանալ, թե ինչ է կատարվում։ Եղեք քաղաքակիրթ, բարի, հանդուրժող, որովհետև սա է տարածաշրջանում կատարվողի խնդիրը»։
Մեկնաբանությունը մեծ իրարանցում է առաջացրել, Լիբանանի մամուլի սինդիկատը պահանջեց ներողություն խնդրել և կոչ արեց բոյկոտել Բարաքի այցելությունները։ Նախագահական պալատը ևս հայտարարություն տարածեց՝ ափսոսանք հայտնելով «մեր հյուրերից մեկի» արած մեկնաբանությունների համար և շնորհակալություն հայտնելով լրագրողներին իրենց «ծանր աշխատանքի» համար։
Մարիո Նաուֆալի հետ հարցազրույցում, որի մի հատված հրապարակվեց հինգշաբթի օրը, Բարաքը հայտարարել էր, որ ինքը «անասունների պես» արտահայտությունը չի օգտագործել «նսեմացնող իմաստով»:
«Բայց դա անտեղի էր, երբ լրատվամիջոցները պարզապես իրենց աշխատանքն էին անում»,- հավելել է նա։
Ընդգծենք, որ վիրավորական համատեքստը ոչ այնքան «անասունների նման» արտահայտության մեջ էր, որքան վերջին արտահայտության մեջ՝ «որովհետև դա է տարածաշրջանում տեղի ունեցողի խնդիրը», ինչն ակնհայտորեն Մերձավոր Արևելքի տարածաշրջանում տեղի ունեցողի համար պատասխանատվության հստակ փոխանցում է։