ՀՀ սննդամթերքի անվտանգության տեսչական մարմնի արագ արձագանքման բաժնի տեսուչները Արարատի մարզի Վերին Արտաշատում վերահսկողական միջոցառումներ են իրականացրել անհատ ձեռնարկատեր Արևիկ Գրիգորյանին պատկանող հանրային սննդի օբյեկտում։
Ինչպես տեղեկացնում է «Արմենպրես»՝ ստուգումների ընթացքում պարզվել է, որ օբյեկտը գործում է սանիտարահիգիենիկ պահանջների խախտումներով։ Արձանագրվել են մի շարք խնդիրներ՝
-
սննդի կառույցը կառուցված չէ այնպես, որպեսզի բացառվի անցանկալի բորբոսի առաջացումը,
-
խոհանոցի հատակը, պատերը և առաստաղը չունեն հարթ մակերես և չեն պահվել նորոգ վիճակում՝ ինչը խոչընդոտում է մաքրմանն ու ախտահանմանը,
-
լվացարանի և սեղանների մակերեսները պատրաստված չեն եղել հիգիենայի պահանջներին համապատասխան նյութերից և չեն պահպանվել նորոգ և բարվոք վիճակում։
Տեսչական մարմնի մասնագետները, հաշվի առնելով նշված խախտումները, կասեցրել են հանրային սննդի օբյեկտի արտադրական գործունեությունը և սահմանել ժամկետ՝ բացահայտված անհամապատասխանությունները վերացնելու համար։