Պարզ ավտովթարների դեպքում այլևս կարիք չի լինի երկար գործողություններ իրականացնել ճանապարհի բանուկ հատվածում․ ինչ է առաջարկում Ավտոապահովագրողների բյուրոն

ԵՐԵՎԱՆ, 11 օգոստոսի․/Նովոստի–Արմենիա/․ Պարզ վթարների դեպքում այլևս կարիք չի լինի երկար գործողություններ իրականացնել ճանապարհի բանուկ հատվածում, հայտնում է Հայաստանի ավտոապահովագրողների բյուրոն։

Սեպտեմբերի 1-ից ճանապարհատրանսպորտային պատահարի դեպքում համաձայնեցված հայտարարագիր լրացնելիս այլևս կարիք չի լինի երկար ժամանակ մնալ ճանապարհին՝ բջջային հավելվածում տարբեր տվյալներ լրացնելու համար։ 

Այժմ կարելի է՝ 

• 
  ASWA բջջային հավելվածով դեպքի վայրում միայն լուսանկարել ավտոմեքենաների վնասվածքները և դրանց փոխադարձ դիրքերը՝ առանց ինտերնետ կապի,   

• 
  Արագ ազատել ճանապարհը, և 3 ժամվա ընթացքում ապահով վայրում և արդեն ինտերնետ հասանելիությամբ բջջային հավելվածում լրացնել մնացած տվյալները։

«Այս հնարավորությունը նպաստում է խցանումների նվազեցմանը, բարձրացնում է բոլորի անվտանգությունը և օգնում է խնայել Ձեր ժամանակը», – նշվում է բյուրոյի հաղորդագրության մեջ։

Բյուրոյից նաև խնդրում են նախապես ներբեռնել ASWA հավելվածը, որպեսզի անհրաժեշտության դեպքում հնարավոր լինի արագ օգտվել այս գործառույթից։

«Նախաձեռնությունը ներդրվել է՝ օգնելու վարորդներին կատարել սեպտեմբերի 1-ից ուժի մեջ մտնող օրենքի փոփոխություններով սահմանված պահանջը. այն է՝ պատահարից հետո ազատել ճանապարհը 20 րոպեում, և խուսափել հնարավոր տուգանքներից։ Բյուրոն շարունակաբար բարեփոխում է ԱՊՊԱ համակարգը՝ այն դարձնելով ավելի արդյունավետ, հասանելի և հարմար վարորդների համար», – նշվում է հաղորդագրության մեջ։