Իսպանական «Բարսելոնայի» նախկին ֆուտբոլիստ Կարլես Պերեսը հայտնել է, որ մի քանի օրից կվերադառնա խաղադաշտ՝ սեռական օրգանների հատվածում շան կծոցի հետևանքով ստացած վնասվածքից հետո:
Ավելի վաղ մամուլը հայտնել էր, որ ներկայումս հունական «Արիսում» վարձավճարով հանդես եկող «Սելտայի» կիսապաշտպանը տեղափոխվել էր հիվանդանոց՝ շան հարձակման պատճառով: Դեպքը տեղի է ունեցել, երբ Պերեսը զբոսնում էր իր շան հետ և փորձել է կանխել իր շան ու մեկ այլ շան միջև կռիվը:
– Վնասվածքը կարերի կարիք ուներ: Այժմ տանն եմ, ինձ հետ ամեն ինչ կարգին է, ապաքինվում եմ: Մի քանի օրից կվերադառնամ խաղադաշտ՝ ավելի մոտիվացված, քան երբևէ: Շնորհակալություն բոլորին աջակցության համար, – Footmercato-ի փոխանցմամբ՝ ասել է Պերեսը:
Իր կարիերայի ընթացքում Պերեսը հանդես է եկել նաև իսպանական «Խետաֆեում» և իտալական «Ռոմայում», որի կազմում նվաճել է Կոնֆերենցիաների լիգայի գավաթը: