Արմինֆո. “Առավոտ” թերթի խմբագրությանը խնդրել են ազատել Մամուլի շենքը, որտեղ այն գտնվել է տասնամյակներ շարունակ։
Պետական գույքի կառավարման կոմիտեի նամակում, որը «Ֆեյսբուքի» իր էջում հրապարակել է “Առավոտի” գլխավոր խմբագիր Աննա Իսրայելյանը, ասվում է, որ «Առավոտի» հետ տարածքի վարձակալության «պայմանագրի վերակնքում հնարավոր չի իրականացնել»: Պարբերականի ղեկավարությանն ուղղված այդ նամակում կոմիտեն թերթին խնդրել է «սեղմ ժամկետում ազատել տարածքը»։
“Այս պատմությունը մեր մասին չէ, «Առավոտի» մասին չէ: Բազմաթիվ խմբագրություններ են գործում Մամուլի շենքից դուրս: Ու թեեւ «Առավոտը» 31 տարի՝ 1994 թվականից, հենց այս շենքում է գործել, ոչինչ, մենք էլ այլ տարածք կգտնենք, կտեղափոխվենք, մեծ ցավ չի: ՈՒ սուսուփուս դա էլ անում էինք, մինչ մեր գործընկերներին հայտնի չդարձավ, որ «Առավոտին» հանում են, ու երեկվանից հեղեղում են հարցերով:
Այս պատմությունն այլ բանի մասին է: Խորհրդային իշխանությունը Մամուլի շենքը հենց խմբագրությունների համար էր կառուցել: Հաջորդող բոլոր իշխանությունները, որքան էլ բարդ հարաբերություններ ունենային ԶԼՄ-ների հետ, միեւնույն է՝ Մամուլի շենքի տարածքները թողնում էին խմբագրություններին:
Իսկ այժմ նախկին լրագրողի կողմից ղեկավարվող կառավարությունը գործող ԶԼՄ-ին հանում է Մամուլի շենքից:
Ասեմ, որ խորհրդային տարիներից այս շենքում շատ բան չի էլ փոխվել՝ ասենք, հազիվ փոխեցին մի վերելակը: Մյուսը փոխվել էր նախորդ իշխանության օրոք: Մի խոսքով՝ իրենց ներդրումը, շատ մեղմ ասած, չկա:
Առաջին իսկ պահից չեմ կասկածել, որ եթե վատություն անելու հնարավորություն ունենան՝ անպայման կանեն: Այս ինչքան կանխատեսելի եք”, – գրել է Իսրայելյանը։
ԱրմԻնֆո-ն դիմել է Իսրայելյանին, որպեսզի ճշտի, թե ինչպես են կոմիտեում հիմնավորել պայմանագիրը չերկարաձգելը, որն է պատճառը: “Պատճառը, հավանաբար, պետք է նշի Պետական գույքի կառավարման կոմիտեն։ Մեզ հայտնի է մոտավորապես հետևյալը. թեև նախորդ բոլոր կառավարությունները Մամուլի շենքի տարածքները գործող լրատվամիջոցներին տրամադրել են անվճար, խորհրդանշական վարձավճարով, սակայն այս կառավարությունը որոշել է, որ դա էլ չի լինի: Պետք է նշեմ, որ 2013 թվականից ոչ մեկի հետ վարձակալության պայմանագիր չի կնքվել”, – նշել է նա։
Նա նաև ուշադրություն է հրավիրել այն հանգամանքին, որ ինչ-որ նախաձեռնություն է սկսվել, որի շրջանակում բոլորը պետք է ազատեն տարածքները, այնուհետև կհայտարարվի աճուրդ, և, եթե շահեն, ապա կարող են վերադառնալ իրենց տարածքներ:
“Ի դեպ, նույն Պետական գույքի կառավարման կոմիտեն դեռ 2019 թվականի սեպտեմբերին հայտարարել էր Մամուլի շենքի նոր տեսքի մասին, ազդարարել էր “ProfEye Challenge” նախագծի մասին և այլն: Բայց, ինչպես հաճախ է պատահում մեր իրականության մեջ, բարի մտադրությունները չեն իրագործվում, իսկ հոռետեսական կանխատեսումներն իրականանում են։ Իսկ 2025 թվականի հունիսին, առանց որևէ ժամկետ նշելու, մեզ անմիջապես ասացին, որ մոտ ժամանակներս ազատենք տարածքը, նոր պայմանագիր չի լինի։ Մենք հրապարակել ենք նրանց գրավոր պատասխանը, այնպես որ դուք ինքներդ կարող եք դրանում համոզվել”, – նշել է Իսրայելյանը։
Ուշագրավ է, որ Մամուլի շենքը ժամանակին ԽՍՀՄ-ում կառուցվել է այն ժամանակ գործող զանգվածային լրատվամիջոցների անդամավճարներով և նախատեսված է եղել բացառապես ԶԼՄ-ների համար: