Իրանն ու եվրոպական երկրները այսօր Ստամբուլում կայացած բանակցություններին համաձայնել են շարունակել միջուկային ծրագրի շուրջ քննարկումները: Իրանի արտաքին գործերի փոխնախարար Կազեմ Ղարիբաբադին հանդիպումը որակել է «լուրջ, բաց և մանրամասն», հաղորդում է Reuters-ը:
Հանդիպումը տեղի է ունեցել Իրանի հյուպատոսարանում և տևել շուրջ չորս ժամ։ Մասնակցել են Եվրամիության և Ֆրանսիա-Բրիտանիա-Գերմանիա եռյակի պատվիրակությունները։ ՄԱԳԱՏԷ-ն ողջունել է բանակցությունները՝ դիտարկելով դրանք հնարավորություն՝ վերսկսելու Իրանում տեսչական այցերը։
Երեք եվրոպական պետությունները նպատակ ունեն մինչև օգոստոսի վերջ վերականգնել դիվանագիտական շփումները Թեհրանի հետ։ Դիվանագետները նշում են, որ իրանական կողմը պետք է կոնկրետ քայլեր ձեռնարկի՝ մինչև վեց ամսով երկարաձգելու ՄԱԿ-ի Անվտանգության խորհրդի թիվ 2231 բանաձևի գործողության ժամկետը, որով հաստատվում է միջուկային համաձայնագիրը։
ԱՄՆ-ն և Իրանը հինգ փուլով բանակցություններ էին անցկացրել մինչև հունիսյան օդային հարվածները Իսրայելի կողմից։ ԱՄՆ նախագահ Դոնալդ Թրամփը հայտարարել էր, որ այդ հարվածները «ոչնչացրել են» Իրանի միջուկային ծրագիրը։ Սակայն NBC News-ը վկայակոչել էր ամերիկյան պաշտոնյաների գնահատականը, ըստ որի՝ թիրախավորված երեք օբյեկտներից միայն մեկն է զգալիորեն վնասվել։
Իրանը շարունակաբար հերքում է միջուկային զենք ստեղծելու նպատակ ունենալը՝ պնդելով, որ ծրագիրը խաղաղ, քաղաքացիական բնույթ է կրում։
