Ելենա Վարդանյան. «Ամառն ազնիվ լինելու համար կատարյալ ժամանակ է»

BRAVO.am-ը շարունակում է ամառային զրույցների իր շարքը: Այս անգամ տաք եղանակին ոտաբոբիկ քայլելու, սառը ձմերուկ վայելելու եւ պատշգամբում գիրք կարդալ իր սովորությունների մասին մեզ պատմել է Կ. Ստանիսլավսկու անվան ռուսական պետական դրամատիկական թատրոնի դերասանուհի Ելենա Վարդանյանը:

– Ինչո՞ւ եք սիրում կամ հակառակը՝ այդքան էլ չեք հավանում տարվա այս եղանակը:

– Ամառը պարզապես տարվա եղանակ չէ: Այն հոգու վիճակ է: Ամառը սիրում եմ տաք ասֆալտի ու հասած ծիրանի բույրերի համար: Նաեւ նրա համար, որ կարելի է փորձից հետո թատրոնից լույսով դուրս գալ. ասես օրը քեզ չի ցանկանում բաց թողնել:

– Ամառային ի՞նչ սովորություն կամ արարողակարգ ունեք։

– Անպայման որդուս հետ բնության գրկում ենք լինում: Շատ եմ սիրում խոտի վրա ոտաբոբիկ քայլել:

– Ինչպե՞ս է ամառն ազդում Ձեր ստեղծագործական էներգիայի վրա:

– Ամռանն ինձ ալիք է պատում՝ ուզում եմ գրել, իմպրովիզ անել, օդից ներկայացումներ կառուցել: Հավատում եմ, որ շոգը մեզնից գոլորշիացնում է ամեն ավելորդ բան, ու մնում է բուն էությունը՝ շատ ստեղծագործական ու շատ կենդանի:

– Ամենաանմոռանալի ու թեժ ամառը: 

– Երբ Ալեքսանդրը դեռ շատ փոքրիկ էր ու առաջին անգամ քայլեց: Այն ամառը, երբ երեխան իր առաջին քայլերն է անում, չի մոռացվում:

– Ինչպե՞ս էիք փոքր տարիքում սիրում անցկացնել ամառը:

– Փողոցում: Միշտ փողոցում: Տուն էի վերադառնում միայն ընթրիքի բույրով: Այն ժամանակ Wi-Fi չկար, բայց ազատություն կար, ինչպիսին ունեն թռչունները: 

– Ո՞րն է մանկությունից մնացած ամառային ամենալավ հիշողությունը:

– Երբ գիրքը ձեռքիս պառկած եմ ցանցաճոճի մեջ, կողքիս պապիկը վերանորոգում է հեծանիվը, տատիկս կանչում պատշգամբից:

– Ի՞նչ եք հասցրել առաջին անգամ անել այս ամռանը: 

– Ինձ թույլ եմ տվել ոչինչ չանել, չպլանավորել, չվերահսկել: Պարզապես լինել:

– Ամառային սիրելի ուտելիքները: 

– Խաշլամա, թարմ կանաչի, սառույցով թան ու, իհարկե, ծիրաններ՝ հասած, քաղցր, ներսում արեւ պարունակող: 

– Ուտեստներ, որ կարողանում եք պատրաստել:

– Կարողանում եմ պատրաստել ամառային տոլմա, մածունով ու վարունգով ամառային ճաշ, եւ սիրում եմ ջեռոցում բանջարեղեն պատրաստել՝ տնական ձեւով, բայց հոգով:

– Զովանալու տարբերակներ:

– Ջուրը՝ լինի սովորական լոգանք, թե լողալ լճում: Ու նաեւ սառը ձմերուկ՝ սառնարանից հանած:

– Ամռանը դիտելու ֆիլմ կամ սերիալ:

– «Կեսգիշերը Փարիզում», որովհետեւ ամառը միշտ մի քիչ երազանքի մասին է: Ու նաեւ Կիրիլ Սերեբրեննիկովի «Ամառը»՝ որպես համարձակության օրհներգ:

– Լավագույն գրքերը առման մասին:

– Տուվե Յանսոնի «Ամառը» շատ ազնիվ գիրք է: Այն կարդում ես ու հիշում, թե որքան կարեւոր է լուռ եւ ուշադիր լինել: Ու այո, Պրուստի գրքերում նույնպես ամառային բույր կա, եթե կարդաս պատշգամբում: 

– Հայաստանում ամռանն այցելելու 3 վայր:

– Սոճիների մեջ զբոսնելու համար՝ Դիլիջանը: Հանուն այնտեղ հասնելու ճանապարհի՝ Տաթեւը, ու պարզապես գիշերային Երեւանը. ամռանն այն առանձնահատուկ է:

– Ինչպե՞ս եք պահում մարզավիճակն ու ի՞նչ առողջ սովորություններ ունեք:

– Շատ ջուր եմ խմում ու աշխատում չուտել ժամը 19:00-ից հետո: Միշտ չի ստացվում, բայց փորձում եմ: 

– Ի՞նչն է տարվա այս եղանակին Ձեզ ամենաշատը ոգեշնչում:

– Մարդիկ: Նրանց դեմքերը՝ երբ հանգստանում են, սիրահարվում, երեխաների հետ խաղում:

– Ո՞րն է կատարյալ ամառը Ձեզ համար:

– Տաք ու ճանապարհորդություններով լի ամառը, երբ դրսում մաքուր օդին փորձեր ենք անում, ու երբ կարելի է արթնանալ առանց զարթուցիչի:

– Արդյո՞ք դերասանի աշխատանքն ու արձակուրդը համատեղելի են:

– Երբեմն՝ ոչ: Բայց ես սովորել եմ արձակուրդ գտնել օրվա ընթացքում՝ մեկ բաժակ սուրճը, կարճ ճանապարհը, որդուս հետ գրկախառնությունները: Դա էլ շունչ քաշելու տեսակ է:

– Որտե՞ղ ու ինչպե՞ս եք պլանավորում հանգստանալ:

– Եթե ստացվի, Ալեքսանդրի հետ ծով կմեկնենք: Եթե ոչ, մեզ համար քաղաքային հանգիստ կկազմակերպենք՝ այգում պիկնիկ կանենք, տանիքում կինո կնայենք, զբոսաշրջիկների պես էքսկուրսիաներ կունենանք: 

– Ի՞նչ է պետք անպայման հասցնել անել այս 2 ամսվա ընթացքում:

– Լռության օր կազմակերպել (ծիծաղում է,-հեղ.):

– Ինչի՞ բույրն առնել:

– Ռեհանի, ծովի ու լոգանքից հետո որդուս մազերի:

– Ի՞նչ շոշափել:

– Սարերում տաք քարեր ու սառը ջուրը՝ գետակում:

– Ի՞նչ դիտել:

– Գիշերային երկնքին՝ առանց լուսարձակների, աստղերին:

– Որտե՞ղ լինել:

– Այնտեղ, որտեղ նախկինում երբեք չես եղել: Անգամ քաղաքից դուրս: Կարեւորն այն է, որ նոր վայր լինի: 

– Ո՞ւմ գրկել պարտադիր:

– Որդուս:

– Ի՞նչ սովորել:

– Բաց թողնել, բայց ոչ մարդկանց, այլ անհանգստությունները:

– Կարդալ:

– Ինչ պատահի, եթե կարդալով կմոռանաս ժամանակի մասին:

– Լսել:

– Առավոտյան փողոցի ձայները: Ու սրտի ձայնը:

– Ի՞նչ չթաքցնել:

– Սեփական ցանկությունները: Ամառը կատարյալ ժամանակ է ազնիվ լինելու համար:

Զրույցը՝ Հասմիկ Բաբայանի
Լուսանկարները՝ Ելենա Վարդանյանի անձնական արխիվից