ՀՀ վարչապետ Նիկոլ Փաշինյանը հայտարարել է, որ Հայաստանը ձգտում է դառնալ Եվրամիության անդամ
ԵՐԵՎԱՆ, 16 հուլիսի./ԱՌԿԱ/. Հայաստանը ձգտում է դառնալ ԵՄ անդամ, հայտարարել է Նիկոլ Փաշինյանն այսօր կայացած մամուլի ասուլիսում։
«Մենք մեր եվրոպացի գործընկերների հետ արձանագրել ենք, որ սա հեշտ գործընթաց չէ։ Նախ՝ ԵՄ բոլոր անդամները պետք է դրա հետ համաձայնվեն, և նույնքան կամ ոչ պակաս կարևոր՝ երկիրը պետք է համապատասխանի ԵՄ չափանիշներին»,-ասել է նա։
Փաշինյանի խոսքով, այս գործընթացի շրջանակում բոլոր առումներով եվրոպական ստանդարտներին համապատասխանելու համար ՀՀ-ում իրականացվում են բարեփոխումներ։
«Այս կետում կա երկու տարբերակ. կամ Հայաստանին ընդունում են ԵՄ անդամ, կամ ՀՀ-ին չեն ընդունում ԵՄ անդամ: Եթե Հայաստանին ընդունում են ԵՄ անդամ՝ շատ լավ, եթե ինչ-ինչ պատճառներով ՀՀ-ին չեն ընդունում ԵՄ անդամ, Հայաստանը այդ կետի վրա լինում է եվրոպական ժամանակակից ստանդարտներին համապատասխանող երկիր: Երկու դեպքում էլ մենք այս ռազմավարությունը չշարունակելու որևէ պատճառ չունենք»,- ասել է Նիկոլ Փաշինյանը:
Վարչապետը նշել է, որ Բրյուսել կատարած իր վերջին այցի ընթացքում քննարկվել է ԵՄ-ի հետ վիզային ռեժիմի ազատականացման գործընթացը և այն դրական է գնահատել։
2025 թվականի մարտի 26-ին ՀՀ ԱԺ-ն հաստատեց երկրի՝ Եվրամիությանը անդամակցելու գործընթացի մեկնարկի մասին օրենքի նախագիծը։ Ապրիլի 4-ին օրենքը ստորագրեց ՀՀ նախագահ Վահագն Խաչատուրյանը։ Ինչպես նշեց ԱԺ եվրոպական ինտեգրման հարցերով հանձնաժողովի ղեկավար Արման Էգոյանը, այս օրինագիծը պարզապես արտահայտում է հայ ժողովրդի կամքը. այս պահին հանրապետության՝ ԵՄ-ին անդամակցելու դիմում ներկայացնելը նախատեսված չէ։