Թուրքիայի արտգործնախարար Հաքան Ֆիդանը Դամասկոսում հանդիպել է Սիրիայի նոր իշխանությունների առաջնորդ Ահմեդ ալ-Շարաայի հետ, որը հայտնի է նաև Աբու Մուհամմադ ալ-Ջուլանի անունով։ Տեղեկությունը հայտնել է Թուրքիայի արտգործնախարարությունը։
Հանդիպման մանրամասները չեն հաղորդվում։
Թուրքիայի նախագահ Ռեջեփ Թայիփ Էրդողանը անցյալ ուրբաթ լրագրողներին ասել էր, որ ԱԳ նախարարը մոտ ապագայում կայցելի Սիրիա։ Նա նաև ասել է, որ Թուրքիան կաջակցի Սիրիայի նոր իշխանություններին իշխանության ինստիտուտներ ստեղծելու, սահմանադրության պատրաստման գործում և այդ հարցերի շուրջ խորհրդակցություններ է սկսել նրանց առաջնորդի հետ։ Շաբաթ օրը France 24 հեռուստաալիքին տված հարցազրույցում Ֆիդանը հաստատել էր առաջիկա այցի մասին տեղեկությունը՝ չնշելով ժամկետները։
Նոյեմբերի 27-ին զինված ընդդիմադիր խմբավորումները Հալեպ և Իդլիբ նահանգներում լայնածավալ հարձակում սկսեցին սիրիական բանակի դիրքերի ուղղությամբ։ Դեկտեմբերի 7-ի երեկոյան նրանք գրավեցին Հալեպը, Համան, Դարաան և Հոմսը, իսկ դեկտեմբերի 8-ին մտան Դամասկոս, որը լքել էին սիրիական կառավարական ուժերի ստորաբաժանումները։ Բաշար ալ-Ասադը հրաժարական տվեց Սիրիայի նախագահի պաշտոնից և լքեց երկիրը։
Դեկտեմբերի 10-ին Մուհամմեդ ալ-Բաշիրը Սիրիայի ընդդիմության կողմից նշանակվեց երկրի նոր անցումային կառավարության ղեկավար, որը կործի մինչև 2025 թվականի մարտի 1-ը։