Միջնորդությունից ոչ մի տվյալ առկա չէ, որ ԱԺ «Հայաստան» խմբակցության պատգամավոր Արթուր Սարգսյանը «հարվածային խմբերում» հավաքագրելու էր ցուցարարներ: Այս մասին լրագրողների հետ զրույցում ասել է փաստաբան Արամ Վարդևանյանը:
«Շատերը հիշում են ՊՊԾ գնդի գրավման դեպքը, որն իրավական առումով ահաբեկչություն չորակվեց: Ուշադրություն դարձրեք՝ նախապես մշակված կոնկրետ ծրագիր, կոնկրետ ընտրված ոստիկանական գունդ, որտեղ ոստիկանության զորքերի ամենից շատ զենք ու զինամթերքն է կենտրոնացված: Մի քանի անձ էլ զոհվել է, ավելին, հաջորդել են կոնկրետ պահանջներ, բայց այս դեպքն ահաբեկչություն չորակվեց: Ճիշտ ու սխալի հարց չէ, պարզապես ահաբեկչությունը որպես հանցանք վերաբերում է բացառիկ դեպքերին»,- ասել է Վարդևանյանը:
Նրա խոսքով՝ հրապարակված ձայնագրությունները չեն կարող վստահելի լինել:
«Հրապարակված ձայնագրությունների սղագրությունների մեջ այսպիսի եզրույթ կա՝ «Ձայնը չի լսվում», «Ձայնը չի հասկացվում»։ Հիմա պատկերացրեք, որ դրանցից յուրաքանչյուրը կարող է ամբողջությամբ փոփոխել խոսակցության իմաստը»,- նշել է փաստաբանը՝ հնարավոր համարելով, որ բացակայող խոսքերը կարող են այդ խոսակցութունները վերածել կենցաղային բնույթի խոսակցությունների։