ԱՄՆ նախագահ Դոնալդ Թրամփը հերքել է լրատվամիջոցներում շրջանառվող տեղեկատվությունը Թեհրանին մոտ 30 միլիարդ դոլարի ներդրումներ ստանալու հարցում օգնելու ամերիկյան վարչակազմի ծրագրերի մասին, եթե Իրանը հրաժարվի ուրանի հարստացման գաղափարից։
Ամերիկացի առաջնորդը այս մասին գրել է Truth Social սոցիալական ցանցում։
«Ստող լրատվամիջոցներից ո՞վ է ասում, որ նախագահ Թրամփը ցանկանում է Իրանին 30 միլիարդ դոլար տրամադրել: Ես երբեք չեմ լսել այս ծիծաղելի գաղափարի մասին։ Սա պարզապես ևս մեկ արտահոսք է, որը հորինել են ստող լրատվամիջոցները՝ ինձ նվաստացնելու համար։ Այս մարդիկ հիվանդ են», – ասել է Թրամփը։
CNN-ի փոխանցմամբ՝ նմանատիպ գաղափար վերջին շաբաթներին քննարկվել է Մերձավոր Արևելքի և Միացյալ Նահանգների հիմնական խաղացողների կողմից։ Մասնավորապես, առաջարկներից մեկը նախատեսում է Իրանի միջուկային ծրագրում 20-30 միլիարդ դոլարի ներդրումների հատկացում, մինչդեռ միջոցները կգան ոչ թե Միացյալ Նահանգներից, այլ արաբական երկրներից։