Մոնիթորինգային այցելություններ «Պատերազմի մասնակիցների մասնագիտական ներուժի բացահայտում» ծրագրի շահառուներին

Ապրիլի 10-ին «Իմ քայլը» բարեգործական հիմնադրամի թիմը հերթական մոնիթորինգային այցն է իրականացնում Արմավիրի մարզ՝ շարունակելու գնահատել «Պատերազմի մասնակիցների մասնագիտական ներուժի բացահայտում» ծրագրի շրջանակում անցյալ տարի ֆինանսավորում ստացած բիզնես ծրագրերի արդյունքներն ու գրանցած հաջողությունները ֆինանսավորումից 6 ամիս անց։

Այս մասին հայտնում է հիմնադրամը՝ հիշեցնելով, որ 2023-2024-ին ծրագիրն ուներ 41 շահառու, իրականացվում էր երկու մարզում` Լոռիում և Արմավիրում, որի արդյունքում ֆինանսավորվել էր պատերազմի հետևանքով վիրավորում ստացած 27 մասնակցի բիզնես ծրագիր` 20-ը Արմավիրից, 7-ը` Լոռու մարզից:

Ծրագրի շահառուներից Կարո Համբարձումյանն ու Ռազմիկ Ֆահրադյանը Մեծամոր համայնքից են։ Նրանք հիմնել են ջերմատնային տնտեսություններ, որոնց զարգացումը հնարավոր է դարձել հիմնադրամի տրամադրած աջակցությամբ։ Այժմ նրանք արդեն արտադրում են տարբեր տեսակի գյուղմթերք և ապահովում են իրենց ընտանիքների եկամուտը։ Կարոն նշեց, որ պատահում է, որ օրական 5-6 ժամ անցկացնի՝ ջերմոցը խնամելով: Հողը դատարկ չի թողնում. բացի անփուշ մոշից՝ աճեցնում է նաև հազար, պլանավորում է տնկել լոլիկ, շուտով նաև ընդլայնել տարածքը:

Ռազմիկի ջերմոցում արդեն գրեթե հասունացել էր վարունգը, որը շուտով կհավաքի և կվաճառի: Նրանց փորձը վկայում է, որ ճիշտ կողմնորոշումը և նպատակային ֆինանսական աջակցությունը կարող են արմատապես փոխել պատերազմի մասնակիցների կյանքը և նպաստել նրանց վերաինտեգրմանը հասարակության մեջ։

Մեծամոր համայնքից են նաև Կարեն Թադևոսյանը և Աշոտ Գրիգորյանը, որոնք զբաղվում են անասնապահությամբ։ Հիմնադրամի աջակցությամբ նրանք ձեռք են բերել անհրաժեշտ սարքավորումներ և անասուններ, ինչի շնորհիվ կարողացել են զարգացնել իրենց տնտեսությունները։

Խաչիկ Հովսեփյանը հիմնել է ֆոտոստուդիա, որտեղ իրականացվում են լուսանկարահանումներ, տպագրման, պատճենման տարբեր աշխատանքներ։ Ստուդիան արդեն սպասարկել է բազում հաճախորդների, և այս պահին Խաչիկը նախատեսում է ընդլայնել տարածքն ու ծառայությունների ցանկը: Փոքրիկ բիզնեսի կառավարման հարցերով իրեն աջակցում է նաև մայրը:

Մոնիթորինգային այցի շրջանակում թիմը հանդիպելու է նաև Սերյոժա Հակոբյանին և Գևորգ Եղիազարյանին՝ հասկանալու, թե ինչ արդյունքների են նրանք հասել ստացած ֆինանսավորմամբ, ինչ մարտահրավերների են բախվել և ինչպիսի աջակցություն կարող է տրամադրել հիմնադրամը ապագայում։

Ինչպես նախորդ տարվա, այնպես էլ այս տարվա մոնիթորինգների փորձը ցույց է տալիս, որ նմանատիպ ծրագրերը չեն սահմանափակվում միայն դրամաշնորհով․ դրանք դառնում են նոր կյանքի, նոր նպատակի և ինքնավստահության սկիզբ։

Կարևոր`

Հիմնադրամը կրկին այցելելու է Արմավիրի շահառուներին 6 ամիս անց՝ հետևելու նրանց բիզնեսների ընթացքին և աջակցելու դրանց կայուն զարգացմանը։

Մշտադիտարկումների առաջիկա կանգառը Լոռու մարզն է:

Այս տարի ծրագիրը իրականացվում է Կոտայքի, Արարատի և Վայոց Ձորի մարզերում և ընդգրկում է 83 շահառու:

«Հայկական Ժամանակ»-ը Telegram-ում