ԱՄՆ Կոնգրեսի Ներկայացուցիչների պալատի խոսնակ Մայք Ջոնսոնը ուրբաթ օրը վերընտրվել է քվեների շատ փոքր տարբերությամբ, ինչը Կապիտոլիումում հանրապետականների միջև հնարավոր տարաձայնությունների ցուցիչն է, գրում է Reuters-ը։
Թվում էր, թե Ջոնսոնը չունի վերընտրվելու համար ձայների անհրաժեշտ քանակ, սակայն երկու հանրապետական հակառակորդներ երկար բանակցություններից հետո փոխել են իրենց մոտեցումը և նրանցից մեկը հայտնել է, որ զանգ է ստացել անձամբ Թրամփից։
Ջոնսոնը վերընտրվել է անհրաժեշտ քվեների նվազագույն քանակով՝ 218 ձայնով: Հանրապետականները կվերահսկեն պալատը ձայների 219-215 հարաբերակցությամբ
Ուրբաթ օրը կայացած քվեարկությունը հանրապետականների՝ միասնական լինելու առաջին փորձությունն էր, քանի որ նրանք առաջ են տանելու Թրամփի՝ հարկերի կրճատման և սահմանների վերահսկման օրակարգը: Այն նաև ցույց տվեց, թե ինչպիսի ազդեցություն ունի Թրամփը Կապիտոլիումում, որտեղ մի քանի հանրապետական նրան դիմակայելու պատրաստակամություն են դրսևորել, գրում է Reuters-ը։
Քվեարկությունից հետո Թրամփը շնորհավորել է Ջոնսոնին։ «Մայքը մեծ խոսնակ կլինի, իսկ մեր երկիրը կշահի»,- գրել է նա սոցցանցերում։