Ադրբեջանի նախագահ Իլհամ Ալիևը Համառուսաստանյան պետական հեռուստառադիոհեռարձակման ընկերությանը և ՌԻԱ «Նովոստի»-ի հետ հարցազրույցում մանրամասներ է հայտնել Հայաստանի հետ խաղաղության պայմանագրի բանակցություններից․
Ադրբեջանի նախագահը
Կիսելյովին տված հարցազրույցում հայտարարել է, որ Երևանին ու Բաքվին մնում է
պայմանավորվել միջազգային դատական ատյաններում փոխադարձ պահանջներից հրաժարվելու և
միասնական սահմանին օտարերկրյա ուժերի տեղակայման շուրջ։
Նա նշել է, որ հենց
այս երկու կետերն են, որոնք դեռևս համաձայնեցված չեն խաղաղության պայմանագրի
նախագծում։ Ալիևը դրանք անվանել է Ադրբեջանի պայմանները։
Ալիևը նաև կրկնել է
Երևանից արդեն արված հայտարարություններն առ այն, որ խաղաղության պայմանագրի 17
հոդվածներից 15-ը համաձայնեցված է։ Միևնույն ժամանակ, նա կրկին մեղադրել է
Հայաստանին «սպառազինությունը մեծացնելու» մեջ՝ ասելով, որ խաղաղության
պայմանագիրը և «միաժամանակ Հայաստանին մեր դեմ զինելը երկու անհամատեղելի ուղղություններ
են»։
Ալիևը կարծում է,
որ «Հայաստանին սպառազինելու գործընթացն առաջ է ընթանում յոթ մղոնանոց քայլերով»,
իսկ Ֆրանսիայից զենքի մատակարարումները «իրական վտանգ են ներկայացնում Ադրբեջանի
համար»։
Միևնույն ժամանակ
Ադրբեջանն ինքն է ակտիվորեն ավելացնում ռազմական ծախսերը. նրա խոսքով՝ 2025 թվականին Ադրբեջանի ռազմական բյուջեն կհասնի
ռեկորդային՝ 5 միլիարդ դոլարի։
Ալիևը կրկին պնդել
է, որ հայկական կողմը փոխի իր Սահմանադրությունը, «քանի որ դրանում հղում կա
Անկախության հռչակագրին, իսկ այնտեղ, իր հերթին, պահանջներ կան Ադրբեջանի տարածքի
նկատմամբ»։ Եվ Բաքուն կրկին համաձայնություն է պահանջում ԵԱՀԿ Մինսկի խմբի
լուծարման հարցում։
«Եթե դա լուծվի,
ապա խաղաղության պայմանագրի ստորագրման համար ոչ մի խոչընդոտ չի լինի»,- ասել է
նա։