Դատավոր Արամ Գրիգորյանը ինքնաբացարկ է հայտնել Արսեն Գևորգյանի և մյուսների գործով

«Ուժեղ Հայաստան» կուսակցության՝ Ստեփանավանի համայնքապետի թեկնածու Արսեն Գևորգյանի վերաբերյալ քրեական գործը կքննի Հակակոռուպցիոն դատարանի դատավոր Վարդգես Սարգսյանը։ Գործը վերամակագրվել է նախկին նախագահող դատավորի ինքնաբացարկից հետո։ Iravaban.net-ը այս մասին տեղեկանում է Դատալեքս դատական տեղեկատվական համակարգից։

Հիշեցնենք, որ գործը նախապես մակագրվել էր դատավոր Արամ Գրիգորյանին, որը մինչ այդ որոշում էր կայացրել Արսեն Գևորգյանի նկատմամբ երկու ամիս ժամկետով կալանքը որպես խափանման միջոց ընտրելու մասին։ Նոյեմբերի 11-ին Գրիգորյանը ինքնաբացարկ է ներկայացրել, հաջորդ օրը՝ նոյեմբերի 12-ին գործը վերամակագրվել է դատավոր Վարդգես Սարգսյանին։

Ինքնաբացարկի որոշման մեջ դատավոր Գրիգորյանը նշել է, որ 2026 թվականի նոյեմբերի 10-ին լրատվամիջոցներում տեղեկություններ են տարածվել Արսեն Գևորգյանի՝ քրեակատարողական հիմնարկում մահվան մասին։ Մահվան հանգամանքների վերաբերյալ հրապարակումներում, այդ թվում՝ մեղադրյալի պաշտպանի հայտարարություններում, նրա մահն անուղղակիորեն կապվել է կալանավորման հանգամանքի հետ։ Միաժամանակ կասկածի տակ է դրվել մինչդատական վարույթի ընթացքում կայացված կալանքի որոշման օրինականությունը, ինչպես նաև գործը նույն դատավորի վարույթում գտնվելու պայմաններում նրա անաչառությունը։

Արամ Գրիգորյանը նշել է, որ ինքն անձամբ կարող է անկողմնակալ լինել գործի քննության ընթացքում, սակայն ստեղծված իրավիճակը կարող է ողջամիտ կասկածներ առաջացնել անաչառ դիտորդի մոտ՝ դատավորի անկողմնակալության վերաբերյալ։

«Արդարադատության շահից ելնելով՝ անհրաժեշտ է հայտնել ինքնաբացարկ»,- նշել է դատավորը՝ հավելելով, որ հակառակ դեպքում կարող է կասկածի տակ դրվել ինչպես դատական քննության օբյեկտիվությունը, այնպես էլ դրա շրջանակում կայացվելիք դատական ակտերի արդարացիությունը։

Նշենք, որ Արսեն Գևորգյանին մեղադրանք էր առաջադրվել 2026 թվականի հոկտեմբերի 25-ին կայանալիք Ստեփանավան համայնքի ավագանու ընտրությունների նախընտրական շրջանում ընտրակաշառք տալու և դրա նախապատրաստման համար։

Ըստ մեղադրանքի՝ Գևորգյանը, լինելով «Ուժեղ Հայաստան» կուսակցության ընտրական ցուցակը գլխավորող թեկնածուն, նախնական համաձայնության է եկել կուսակցության դեռևս չպարզված անդամների հետ և խմբի կազմում, մեկ միասնական դիտավորությամբ, ընտրելու իրավունք ունեցող մի շարք անձանց տվել ընտրակաշառք, ինչպես նաև նախապատրաստվել է ընտրակաշառք տալու։

Այս քրեական գործով ընդհանուր առմամբ կա 14 մեղադրյալ, որոնցից վեցը կալանավորվել են, իսկ մյուսների նկատմամբ ընտրվել են ավելի մեղմ խափանման միջոցներ։

Հիշեցնենք, որ 46-ամյա Արսեն Գևորգյանը նոյեմբերի 10-ին մահացել է «Նուբարաշեն» քրեակատարողական հիմնարկում։ Նրա մահվան դեպքի առթիվ նախաձեռնվել է առանձին քրեական վարույթ։

Leave a Comment