Փաշինեան Եւ Ալիեւ Տապլինի Մէջ Միտքեր Փոխանակեցին Խաղաղութեան Օրակարգի Յառաջմղման Շուրջ

Տապլինի մէջ Եւրոպական քաղաքական համայնքի վեհաժողովին ընթացքին 12 նոյեմբերին հանդիպում ունեցան Հայաստանի վարչապետ Նիկոլ Փաշինեանը եւ Ազրպէյճանի նախագահ Իլհամ Ալիեւը:

Հայաստանի կառավարութեան լրատուականի հաղորդագրութեան համաձայն, պետութիւններու ղեկավարները միտքեր փոխանակեցին Ազրպէյճանի եւ Հայաստանի միջեւ խաղաղութեան օրակարգի յառաջմղման շուրջ` հիմնուելով 8 օգոստոս 2025-ին Ուաշինկթընի մէջ կայացած խաղաղութեան վեհաժողովի արդիւնքներուն եւ անոր ծիրին մէջ ստորագրուած ուաշինկթընեան միացեալ հռչակագիրին վրայ:

«Քննարկումները կենտրոնացած էին երկու երկիրներուն միջեւ խաղաղութեան հետագայ ամրապնդման ուղղուած գործնական քայլերուն վրայ, որոնց շարքին` փոխադրական եւ տարանցիկ կապերի զարգացման, տնտեսական ու առեւտրական յարաբերութիւններու, սահմաններու սահմանազատման, ինչպէս նաեւ վստահութեան ամրապնդման միջոցառումներու իրականացման շուրջ», կը նշուի հաղորդագրութեան մէջ:

Անոնք քննարկեցին «Թրամփի ուղի»-ի զարգացման ընթացքը, անոր երկաթուղային եւ մայրուղիի բաղադրիչներու ծրագրաւորումն ու նախագծումը, ինչպէս նաեւ այս երթուղիով տարանցիկ կապերու հեռանկարները:

Իբրեւ դրական զարգացում նշուեցաւ Ազրպէյճանի տարածքով դէպի Հայաստան եւ Հայաստանէն ապրանքներու տարանցումը: Անցեալ տարուան նոյեմբերէն ի վեր Ազրպէյճանի տարածքով Հայաստան տեղափոխուած է ընդհանուր առմամբ 105 հազար թոն բեռ:

Կողմերը նաեւ միտքեր փոխանակեցին Ազրպէյճանի եւ Հայաստանի միջեւ տնտեսական ու առեւտրական յարաբերութիւններու հետագայ զարգացման կարելիութիւններուն վերաբերեալ, որոնց կարգին քննարկուեցան նաեւ ելեկտրականութեան ցանցերու յառաջիկայ փոխկապակցութեան վերաբերող հարցեր:

Անոնք ընդգծեցին շրջակայ միջավայրի եւ անդրսահմանային ջրային պաշարներու ոլորտին մէջ համագործակցութեան կարեւորութիւնը եւ ողջունեցին անդրսահմանային գետերու կառավարման հարցերով աշխատանքային խումբերու ստեղծումը:

Փաշինեան եւ Ալիեւ վերահաստատեցին խաղաղութեան գործընթացի դրական կշռոյթի պահպանման, ինչպէս նաեւ շրջանին մէջ խաղաղութեան, կայունութեան եւ բարգաւաճման ամրապնդման վերաբերող երկխօսութեան շարունակութեան կարեւորութիւնը:

Նոյն բովանդակութեամբ հաղորդագրութիւն տարածեց նաեւ ազրպէյճանական կողմը:

Տապլինի մէջ զրոյցներ ունեցան նաեւ Հայաստանի եւ Ազրպէյճանի արտաքին գործոց նախարարներ Արարատ Միրզոյեան եւ Ճէյհուն Պայրամով, Հայաստանի Անվտանգութեան խորհուրդի քարտուղար Ալեն Սիմոնեան եւ Ազրպէյճանի նախագահի օգնական Հիքմեթ Հաճիեւ:

Leave a Comment