Հունաստանի խորհրդարանը հոկտեմբերի 23-ին ընդունել է օրենք, որով 15 տարեկանից փոքր երեխաներին արգելվում է օգտվել սոցիալական ցանցերից։ Արգելքն ուժի մեջ կմտնի 2027 թվականի հունվարի 1-ից, իսկ օգտատերերի տարիքի ստուգում չապահովող հարթակներին սպառնում են տուգանքներ՝ մինչև համաշխարհային տարեկան շրջանառության 6%-ի չափով։
Օգտատերերի տարիքը պետք է ստուգեն հենց հարթակները։ Եղանակներից մեկը կլինեն Kids Wallet և Gov.gr Wallet պետական հավելվածները։ Դրանք թույլ են տալիս հաստատել, թե արդյոք օգտատերը հասել է սահմանված տարիքին՝ առանց հարթակին փոխանցելու ծննդյան ամսաթիվը և այլ անձնական տվյալներ։ Հունաստանի վարչապետ Կիրյակոս Միցոտակիսը հայտարարել է, որ սոցցանցերն ունեն երկուսուկես ամիս՝ գաղտնիությունը պահպանելով տարիքի ստուգման մեխանիզմ մշակելու համար։
Օրենքին աջակցել է միայն իշխող «Նոր ժողովրդավարություն» կուսակցությունը, որը խորհրդարանում մեծամասնություն ունի։ Դեմ են քվեարկել «Սիրիզան», «Հունական լուծումը», Հունաստանի կոմունիստական կուսակցությունը, «Նիկին» և «Ազատության ուղին»։ ՊԱՍՕԿ-ը ձեռնպահ է մնացել։ Կուսակցությունն առաջարկում էր սոցցանցերն արգելել միայն մինչև 13 տարեկան երեխաների համար, իսկ 13–14 տարեկանների համար սահմանել ծնողական վերահսկողություն։
Թվային կառավարման և արհեստական բանականության նախարար Դիմիտրիս Պապաստերգիուն արգելքը որակել է անհրաժեշտ, արդյունավետ և համաչափ միջոց, որը համապատասխանում է ԵՄ օրենսդրությանը։ Նա այն համեմատել է ալկոհոլի և ծխախոտի վաճառքի տարիքային սահմանափակումների հետ և հայտարարել, որ Հունաստանը չի կարող սպասել համաեվրոպական օրենքի ընդունմանը, քանի որ ինտերնետի անվերահսկելի օգտագործումն առաջացնում է կախվածություն և վնասում երեխաների հոգեկան առողջությանը։ Հունաստանի իշխանությունների գնահատմամբ՝ լրահոսի անվերջ թերթելը նաև խանգարում է երեխաներին քնել և կենտրոնանալ, ինչպես նաև կրճատում է ընկերների հետ անցկացրած ժամանակը։
Հունաստանը նաև ԵՄ առաջին երկրներից է, որոնք Դանիայի, Ֆրանսիայի, Իտալիայի և Իսպանիայի հետ փորձարկում են Եվրահանձնաժողովի մշակած օգտատերերի տարիքի ստուգման համակարգը։ Համակարգը թույլ է տալիս հաստատել օգտատիրոջ տարիքը՝ առանց սոցցանցին այլ անձնական տվյալներ փոխանցելու։
Նման սահմանափակումներ առաջինը մտցրել է Ավստրալիան։ Այնտեղ 2025 թվականի դեկտեմբերից 16 տարեկանից փոքր երեխաներին արգելված է օգտվել մի շարք սոցցանցերից։
Ֆրանսիայում նմանատիպ նախաձեռնությունն ուժի մեջ չի մտել։ Երկրի Սահմանադրական խորհուրդը 2026 թվականի օգոստոսի 14-ին չեղարկել է մինչև 15 տարեկանների համար սոցցանցերի արգելքի մասին օրենքի հիմնական հոդվածը՝ համարելով, որ այն անհամաչափորեն սահմանափակում է արտահայտվելու ազատությունը։
Քվեարկությունն անցել է աշակերտների, ուսանողների և դասախոսների զանգվածային բողոքի ակցիաների ֆոնին, որոնք հոկտեմբերի 21-ին անցկացվել են Աթենքում և այլ քաղաքներում։ Մասնակիցները պահանջում էին ավելացնել կրթության ֆինանսավորումը, բարելավել դպրոցներում պայմանները, բարձրացնել մանկավարժների աշխատավարձերը և լուծել ուսանողական թանկ բնակարանների խնդիրը։ Ոստիկանության տվյալներով՝ Աթենքում և արվարձաններում ցույցերին մասնակցել է շուրջ 10 հազար մարդ։
