Նիկոլ Փաշինյանի կառավարման օրոք քաղաքական հետապնդումներից բացի այլ ակնկալիք չենք կարող ունենալ, քանի որ այս դատերը նրա «զանգովի արդարադատության» տիրույթից են։ Այս մասին դատարանի բակում լրագրողների հետ զրույցում ասել է Երևանի ավագանու անդամ Արշակ Սարգսյանն՝ անդրադառնալով ՀՀ երկրորդ նախագահ Ռոբերտ Քոչարյանի նկատմամբ իրականացվող քրեական գործողություններին։
Նրա խոսքով՝ իշխանությունը փորձում է քաղաքական հետապնդումներով մեկուսացնել Ռոբերտ Քոչարյանին ու նրա ընտանիքին։
«Ութ տարի պայքար ենք տարել։ Նախագահ Քոչարյանը երկու տարի ապօրինի կալանքի տակ գտնվեց, ինչից հետո արդարացվեց։ Նիկոլ Փաշինյանը փորձում է քաղաքական հետապնդումներով նրան ու ընտանիքի անդամներին հեռացնել քաղաքական գործունեությունից։
Նա հասկանում է, որ առանց այս ապօրինի գործերի չի կարողանալու պահել իշխանությունը և կատարել Ադրբեջանի հետ ձեռք բերված պայմանավորվածությունները։ Սա հենց այն կետն է, որտեղ հատվում են քաղաքական հետապնդումը, ալիևյան սահմանադրության փոփոխությունը և տարածքների հանձնումը»,- ընդգծել է Սարգսյանը։