Ըմբշամարտ. Արամայիս Յարութիւնեան Յաղթեց Ազրպէյճանցի Իր Մրցակիցին – Aztag Daily

Հայաստանի յունահռոմէական ոճի ըմբիշ Արամայիս Յարութիւնեան (130 քկ) շատ հետաքրքրական յաղթանակ արձանագրեց Ազրպէյճանի ներկայացուցիչ Մազայիմ Մարտանովի դէմ, Լաս Վեկասի (Միացեալ Նահանգներ) մէջ տեղի ունեցող մինչեւ 23 տարեկաններու ըմբշամարտի աշխարհի ախոյեանութեան:

Մենամարտը վերջ գտաւ 5-5 արդիւնքով, բայց յաղթանակը շնորհուեցաւ Յարութիւնեանին, որ վերջին կէտը շահեցաւ: Մրցումի ընթացքին հայ ըմբիշը կը պարտուէր 5-0 արդիւնքով, բայց Յարութիւնեան ինքզինք գտաւ եւ տպաւորիչ վերադարձով 5 յաջորդական կէտեր շահեցաւ ու խլեց յաղթանակը:

Այս յաղթանակին շնորհիւ ան իրաւունք ստացաւ մրցելու պրոնզէ մետալի մրցումին, բայց Ղազախստանի ներկայացուցիչ Ժոխար Ուզարովէն ան պարտուեցաւ 5-1 արդիւնքով:

77 քկ կշիռի մրցումներուն ալ Սամուէլ Տէրտէրեան 1-1 արդիւնքով աւարտեց վրացի Անրի Փութքարածէի դէմ մրցումը, բայց յաղթանակը շնորհուեցաւ մրցակիցին` առաջին կէտը շահելուն պատճառով:

Նշենք, որ յունահռոմէական ոճի ըմբշամարտի ախոյեանութեան մրցաշարքի ընթացքին Հայաստանի հաւաքականը 2 արծաթ մետալներով աւարտեց իր ելոյթները. 72 քկ կշիռի ըմբիշ Գասպար Տէրտէրեան եւ 82 քկ կշիռի ըմբիշ Մարտիկ Պետրոսեան կրցած էին աւարտական հասնիլ:

Leave a Comment