Երևանի փոխքաղաքապետ Սուրեն Գրիգորյանը պարզաբանել է իր հարցազրույցից հետո տարածված այն մեկնաբանությունները, թե քաղաքապետարանը նախատեսում է արգելել մարզերից ժամանող տրանսպորտի մուտքը Երևան։
Նա ընդգծել է, որ արգելքի մասին հայտարարություն չի արել, իսկ քննարկվող ծրագիրը քաղաքապետարանի երկարաժամկետ ռազմավարական նպատակներից է։
«Կա թյուրըմբռնում, թե իբր նախատեսվում է արգելել մարզային տրանսպորտի մուտքը Երևան։ Նման պնդում չեմ արել»,- գրել է Գրիգորյանը՝ անդրադառնալով Factor TV-ին տված հարցազրույցից հետո տարածված մեկնաբանություններին։
Փոխքաղաքապետը նշել է, որ հարցազրույցում խոսել է Երևանի երթևեկության խնդիրների և դրանց լուծման հնարավոր տարբերակների մասին։
«Երևանի քաղաքապետարանի ռազմավարական նպատակներից մեկն է ստեղծել հնարավորություն, որպեսզի Երևան ժամանող մեր հայրենակիցները քաղաքի մուտքերի մոտ կառուցված ավտոկայանատեղիներում թողնեն իրենց մեքենաներն ու մայրաքաղաքում տեղաշարժվեն հանրային տրանսպորտով»,- պարզաբանել է Գրիգորյանը։
Նա շեշտել է, որ խոսքը «ոչ թե վաղվանից ներդրվող համակարգի, այլ ռազմավարական նպատակի մասին է, որին պետք է փուլ առ փուլ հասնել»։
Ավելի վաղ՝ Factor TV-ի հետ հարցազրույցում, փոխքաղաքապետը պարզաբանել էր, որ գաղափարը կապված է մարզերից և այլ քաղաքներից Երևան մուտք գործող ավտոմեքենաների հոսքը կարգավորելու անհրաժեշտության հետ։
«Պետք է մենք գնանք նրան, որ մարդիկ գան որոշակի կետում իրենց ավտոմեքենաները թողնեն։ Այսինքն՝ պետք է լինեն ավտոկայանատեղիներ՝ քաղաքի մուտքերի մոտ, որից հետո արդեն հանրային տրանսպորտով երթևեկեն»,- ասել էր Գրիգորյանը։
Նա նաև ընդգծել էր, որ թե՛ ավտոկայանատեղիների կառուցումը, թե՛ հանրային տրանսպորտի համալրումը ժամանակ են պահանջում։
Հոկտեմբերի 12-ին Երևանի քաղաքապետ Տիգրան Ավինյանը առաջարկել էր փուլ առ փուլ ընդլայնել ավտոբուսային գծերի ցանցը և հայտնել էր նոր ավտոբուսներ ձեռք բերելու ծրագրի մասին։ Նա նշել էր, որ պետք է պայմաններ ստեղծել, որ մարդիկ անձնական ավտոմեքենաներից անցնեն հասարակական տրանսպորտի։
Կարդացեք նաև՝
Մինչև 2030-ը պիկ ժամերին ավտոբուսով երթևեկությունը պետք է 30%-ով արագանա․ Ավինյան
