45 դատական նիստերէ եւ վկաներու ու մեղադրեալներու կողմէ տրուած աւելի քան 100 վկայութիւններէ ետք, պաշտպանական եւ մեղադրող կողմերը անցած են աշխարհահռչակ ֆութպոլիստ Տիեկօ Մարատոնայի մահուան հարցով դատավարութեան աւարտական ճառերուն:
Մարատոնա 60 տարեկանին մահացած էր 25 նոյեմբեր 2020-ին` սրտի անակնկալ կաթուածէ մը ետք, ուղեղի վիրաբուժութենէ ետք ապաքինման ժամանակաշրջանին, իր տան մէջ:
Անցեալ ապրիլէն ի վեր բժշկական անձնակազմի անդամներ կը դատուին Սան Իզիտրոյի մէջ:
Մարատոնայի առողջական վիճակին հետեւած եւ անոր բուժում տրամադրող հիւանդապահները դատարանին առջեւ են անոր մահուան հետ կապուած գործով: Մեղադրող կողմը կը պնդէ, որ անոնք շատ անհոգ եւ անբաւարար աշխատած են: Մարատոնային չէր տրամադրուած անհրաժեշտ խնամք եւ բուժում, որ պատճառ դարձաւ անոր մահուան:
Դատախազ Փաթրիսիօ Ֆերարի յայտարարեց, որ 11 նոյեմբեր 2020-ին ուղեղի վիրաբուժութեան ենթարկուելէ ետք, ֆութպոլիստը հիւանդանոցէն դուրս գալէ ետք վերածուած էր «լարուած ռումբ»-ի:
«Անոնք բառին բուն իմաստով ազատեցան իրմէ եւ տեղափոխեցին տուն, ուր ան մահացաւ 14 օր ետք: Մարատոնա պէտք էր գտնուէր բժշկական հսկողութեան տակ, եւ անոր տունէն կը բացակայէր նոյնիսկ շտապ օգնութեան անձնակազմը», ըսաւ դատախազը:
Լէոփոլտօ Լուքէ, որ Մարատոնայի ուղեղի վիրաբոյժն էր, 12 տարուան բանտարկութեան վճիռ կը դիմակայէ, առաւել 10 տարուան աշխատանքէ զրկում:
Նանսի Ֆորլինի, որ Մարատոնայի տան բժշկական մարմնի ընդհանուր պատասխանատուն էր, 10 տարուան բանտարկութեան վճիռ կրնայ ստանալ: Ակիւսթինա Քոսաչով հոգեբոյժ էր եւ 8 տարուան բանտարկութեան վճիռ կրնայ ստանալ, Քարլոս Տիաս իր կարգին հոգեբան էր եւ 5 տարուան բանտարկութեան վճիռ կրնայ ստանալ, մինչ հիւանդապահներ Մարիանօ Փերոնի եւ Ռիքարտօ Ալմերոն 4-ական տարի կրնան բանտարկուիլ, իսկ բժիշկ Փետրօ Տի Սփանիա անպարտ մնաց:
Կը սպասուի, որ մօտիկ ապագային դատարանը վերջնական վիճռները արձակէ: