Անգլիայի հավաքականի նախկին պաշտպաններ Գարի Նևիլն ու Ջեյմի Կարագերը, ովքեր այժմ ֆուտբոլային փորձագետներ են, մեկնաբանել են «Մանչեսթեր Սիթիի» ֆինանսական խախտումների գործով անկախ հանձնաժողովի մեղադրական վճիռը։
«Մենք նստած ենք ստուդիայում և նույնիսկ չենք հասկանում, թե այս ամենն ինչ է նշանակում։ «Մանչեսթեր Սիթիի» երկրպագուներն այժմ ուրախ են «Էնֆիլդում» տարած հաղթանակի համար, բայց ինձ թվում է՝ նրանք դեռ չեն գիտակցում այն խարանը, այն անջնջելի բիծն ու ահռելի վնասը, որն արդեն հասցվել է իրենց ակումբին։
«Լիվերպուլի» ֆանատները նրանց ուղղությամբ երգում են՝ «Դուք դուրս եք թռչելու», գնդակին ամեն հպման ժամանակ բղավում են՝ «խարդախներ», և այս խարանից այլևս փախչելու տեղ չկա։
Տրիբունաների հեռավոր անկյունում մի պաստառ էր կախված, որն ինձ պարզապես ապշեցրեց. «Երկրպագուների մի ամբողջ սերունդ խաբված է եղել»։ Եվ հավատացեք, հենց այսպիսի տրամադրություններ են տիրելու ողջ երկրում»,- Նևիլի խոսքերն է մեջբերել Sky Sports-ը։
««Մանչեսթեր Սիթիի» շուրջ ստեղծված այս թունավոր մթնոլորտը միայն ուժեղանալու է նրանց յուրաքանչյուր նոր հաղթանակի հետ։ Բացասական ալիքն ամբողջ երկրում կշարունակի աճել։ Մեզ անհրաժեշտ է վերջնական իրավաբանական լուծում որքան հնարավոր է շուտ։ Մենք դիտում ենք այսօրվա սուպերխաղը, բայց ո՞րն է դրա իրական արժեքն այս ամենի ֆոնին»,- ասել է Կարագերը։
Կիրակի «Մանչեսթեր Սիթին» արտագնա խաղում հաղթել էր «Լիվերպուլին» և վերադարձել Անգլիայի Պրեմիեր լիգայի մրցաշարային աղյուսակի առաջին հորիզոնական։