Երկու աշխատող, որոնցից մեկը ստանում է 200 000 դրամ, մյուսը՝ մեկ դրամով ավելի։ Երկրորդը մաքուր ստանում է մոտ 4800 դրամով պակաս։ Եվ այդպես կշարունակվի, մինչև նրա աշխատավարձը չհասնի 206 400 դրամի։ Պատճառը առողջության ապահովագրավճարի շեմն է։
Ինչպես տեղեկացնում է Iravaban.net-ը, պահումները սահմանված են Հարկային օրենսգրքով, «Կուտակային կենսաթոշակների մասին» օրենքով, զինծառայողների կյանքին կամ առողջությանը պատճառված վնասների հատուցման մասին օրենքով և «Առողջության համընդհանուր ապահովագրության մասին» օրենքով։
Ի՞նչ է պահվում 200 000 դրամից
- եկամտային հարկ՝ 20 տոկոս՝ 40 000 դրամ,
- սոցիալական վճար՝ 5 տոկոս՝ 10 000 դրամ,
- դրոշմանիշային վճար՝ 1000 դրամ։
Ընդամենը՝ 51 000 դրամ, մաքուր՝ 149 000 դրամ։ Առողջության ապահովագրավճար չի պահվում, քանի որ «Առողջության համընդհանուր ապահովագրության մասին» օրենքի 46-րդ հոդվածի անցումային դրույթներով 2026 թվականին համակարգում ընդգրկված են միայն 200 001 դրամ և ավելի աշխատավարձ ստացողները։ Մանրամասները՝ այս նյութում։
Ի՞նչ է պահվում 200 001 դրամից
- եկամտային հարկ՝ 40 000 դրամ,
- սոցիալական վճար՝ 10 000 դրամ,
- դրոշմանիշային վճար՝ 1000 դրամ,
- առողջության ապահովագրավճար՝ 4800 դրամ։
Ընդամենը՝ 55 800 դրամ, մաքուր՝ մոտ 144 200 դրամ։ Այսինքն՝ մեկ դրամով ավելի աշխատավարձը մաքուր տալիս է 4800 դրամով պակաս։
Ո՞ր աշխատավարձից է տարբերությունը վերանում
200 001-ից մինչև 500 000 դրամ աշխատավարձի դեպքում մաքուր մնում է աշխատավարձի 75 տոկոսը՝ հանած 5800 դրամ (1000 դրոշմանիշ և 4800 ապահովագրավճար)։ Որպեսզի այդ գումարը հասնի 149 000 դրամի, աշխատավարձը պետք է լինի 206 400 դրամ. 206 400 դրամի 75 տոկոսը 154 800 դրամ է, հանած 5800 դրամ՝ 149 000 դրամ։
Այսինքն՝ 200 001դրամից մինչև 206 400 դրամ աշխատավարձ ստացողները մաքուր ստանում են ավելի քիչ գումար, քան 200 000 դրամ ստացողը։ Օրինակ՝ 203 000 դրամ աշխատավարձից մաքուր մնում է 146 450 դրամ։
Ի՞նչ է լինում, եթե կուտակային համակարգի մասնակից չեք
Մինչև 1974 թվականը ծնված և կենսաթոշակային ֆոնդի ընտրության դիմում չներկայացրած աշխատողներից սոցիալական վճար չի պահվում։ Նրանց դեպքում 200 000 դրամից մաքուր մնում է 159 000 դրամ, 200 001 դրամից՝ մոտ 154 200 դրամ։ Տարբերությունը նույնն է՝ 4800 դրամ։
Ի՞նչ է փոխվում 2027 թվականից
2027 թվականի հունվարի 1-ից առողջության ապահովագրության համակարգը տարածվում է նաև մինչև 200 000 դրամ աշխատավարձ ստացողների վրա։ Այսինքն՝ 200 000 դրամի շեմը որպես բաժանարար գիծ վերանում է։ Նրանց աշխատավարձից պահվելիք գումարի չափի մասին կարդացեք այս նյութում։
Ամփոփում
Ամփոփելով՝ 200 000 դրամ աշխատավարձից մաքուր մնում է 149 000 դրամ, 200 001 դրամից՝ մոտ 144 200, քանի որ 200 001 դրամից սկսած պահվում է 4800 դրամ առողջության ապահովագրավճար, տարբերությունը վերանում է միայն 206 400 դրամ աշխատավարձի դեպքում, իսկ 2027 թվականից շեմն այլևս բաժանարար գիծ չի լինի, – տեղեկացնում է Iravaban.net-ը։
Այլ աշխատավարձերի մաքուր գումարները՝ 250 000-ից մինչև 1 միլիոն, կարդացեք այս նյութում, իսկ ապահովագրավճարի մասին՝ այստեղ։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։