ԱՄՆ նախագահ Դոնալդ Թրամփը հայտարարել է, որ Ռուսաստանի նախագահ Վլադիմիր Պուտինի հետ հաջող հեռախոսազրույցի ընթացքում պայմանավորվածություն է ձեռք բերվել դիզելային վառելիքի մեծածավալ մատակարարումների շուրջ։ Նրա խոսքով՝ Ռուսաստանը վառելիք կմատակարարի ամերիկյան և համաշխարհային շուկաներին։
«Ռուսաստանն անմիջապես ավելի քան 300 000 տոննա դիզելային վառելիք կմատակարարի ամերիկյան և համաշխարհային շուկաներին, նոյեմբերին՝ ևս 500 000 տոննա, իսկ դրանից անմիջապես հետո՝ 1 միլիոն տոննա։ Բացի այդ, հաշվի առնելով դիզելային վառելիքի վերամշակման գործարանների վիճակը՝ Ռուսաստանը կարճ ժամանակահատվածում կմատակարարի ևս 3 միլիոն տոննա դիզելային վառելիք»,- գրել է Թրամփը։
Նրա պնդմամբ՝ Հորմուզի նեղուցի նկատմամբ ԱՄՆ-ի լիակատար վերահսկողության և ռուսական էներգակիրների մատակարարումների մասին հայտարարության արդյունքում դիզելային վառելիքի գները կնվազեն ռեկորդային չափով և կարճ ժամանակում։
«Ամերիկացիների, հատկապես մեր մեծ ֆերմերների, անասնապահների և բեռնատարների վարորդների համար գների նվազեցումն իմ գլխավոր առաջնահերթությունն է։ Սա շատ մեծ և կարևոր հայտարարություն է»,- նշել է ԱՄՆ նախագահը։
Թրամփը նաև ընդգծել է, որ Իրանը միջուկային զենք չի ունենալու։
«Պետք է նաև հասկանալ, որ Իրանը միջուկային զենք չի ունենալու»,- գրել է նա։