Կարող են ստեղծել հանձնաժողով, որ վարչապետը դիպլոմ չունի, լրագրողների հետ ճեպազրույցում հայտարարեց վարչապետ Նիկոլ Փաշինյանը։
Լրագրողը մասնավորապես հետաքրքրվել էր՝ «եկեղեցում կարո՞ղ են հանձնաժողով ստեղծել ու քննարկել՝ վարչապետը դիպլոմ չունի, ինչպե՞ս է վարչապետ», ինչին Նիկոլ Փաշինյանը պատասխանեց. «Այստեղ այլ խնդիր կա՝ վարչապետի դիպլոմ չունենալը անհամատեղելի չի վարչապետի պաշտոնի հետ, իսկ Կտրիճ Ներսիսյանի՝ աղջիկ ունենալն անհամատեղելի է կաթողիկոսի պաշտոնի հետ»։
Օրերս խորհրդարանում ստեղծվել է քննիչ հանձնաժողով՝ Հայ Առաքելական եկեղեցու շուրջ իրավիճակն ուսումնասիրելու համար, թեև Հայաստանում եկեղեցին ու պետությունն անջատ են իրարից: Քննադատները սա համարում են պետության կողմից ուղիղ միջամտություն եկեղեցու գործերին, սակայն դա ետ չի պահում ՔՊ-ին:
Նախօրեին էլ Ամենայն Հայոց կաթողիկոսը Մայր Աթոռում մի խումբ իրավաբանների, իրավապաշտպանների և սահմանադրագետների հետ քննարկել է եկեղեցու մասին կառավարության պատրաստած զեկույցը և դրա հետքերով խորհրդարանում իշխանական պատգամավորների ջանքերով քննիչ հանձնաժողովի ստեղծումը: Խորհրդակցության մասնակիցները դատապարտել են քննիչ հանձնաժողովի ստեղծումը՝ այն որակելով որպես եկեղեցու ներքին կյանքին և ինքնակառավարմանը միջամտելու փորձ։