Հայաստան ադրբեջանցի զինծառայողի ներթափանցման մասով մանրամասն տեղեկություն հնարավոր կլինի տրամադրել՝ թե՛ ծառայողական քննությունների, թե՛ քննչական գործողությունների անցկացումից հետո, Ազգային ժողովում հայտարարեց պաշտպանության նախարար Սուրեն Պապիկյանը՝ չհստակեցնելով, թե որ գերատեսչություններում է անցկացվում ծառայողական քննություն:
«Թերացումներ եղել են, դրանք ունեցել են և կունենան հետևանքներ, բայց դրա ամբողջական հետևանքների մասին կարող ենք խոսել ծառայողական քննությունից հետո», – նշեց Պապիկյանը:
Նախարարը, սակայն, առանց իր նշած քննության արդյունքներին սպասելուն պնդեց՝ տեղի ունեցածը դիվերսիա չէր. «Նախ նա դիմադրություն ցույց չի տվել, երբ ՀՀ պատկան մարմինները նրան ձերբակալելիս են եղել, դա ցուցիչ է նրա, որ նա դիվերսիանտ չէր»:
Ադրբեջանցի զինծառայող Նասիմի Մուսաևը, որ ըստ պաշտոնական Բաքվի, ինքնակամ լքել է Լաչինի զորամասը, ձերբակալվել էր հոկտեմբերի 1-ին՝ Սյունիքի Շաքի գյուղում: Նախքան վնասազերծվելը նա մտել էր գյուղի տներից մեկը: Տանտիրուհին, իր երկու անչափահաս երեխաներին զինվորից պաշտպանելիս, ոտքի ծանր հրազենային վիրավորում է ստացել, կորցրել ձեռքի մատները:
Ադրբեջանցի զինծառայողը կալանավորված է, նրան մեղադրանք է առաջադրվել սահմանը ապօրինի հատելու, զենքի մաքսանենգության, զենքի գործադրմամբ առողջությանը ծանր վնաս հասցնելու, հրազենի ապօրինի շրջանառության և բնակարանի անձեռնմխելիությունը խախտելու հոդվածներով:
Ներթափանցման դեպքից մի քանի օր գեներալ-մայոր Դավիթ Սանամյանը ազատվեց ԱԱԾ տնօրենի տեղակալի պաշտոնից: Սանամյանի հիմնական պատասխանատվության ուղղությունը ԱԱԾ Սահմանապահ զորքերի համակարգումն ու վերահսկողությունն էր։ Առայժմ պաշտոնապես որևէ մեկնաբանություն չկա, արդյոք այս պաշտոնանկությունն ուղիղ կապվա՞ծ էր ադրբեջանցի զինծառայողի Շաքի ներթափանցման հետ:
Հայաստանի վարչապետ Նիկոլ Փաշինյանն էլ այսօր Ազգային ժողովում պատասխանելով պատասխանելով ընդդիմադիր պատգամավոր Լիաննա Գասպարյանի հարցին, թե ինչո՞ւ չեն նկարել և համացանցում տեղադրել ադրբեջանցի զինծառայողի ձերբակալության կադրերը, ինչպես անում են հայաստանյան շատ գործիչների դեպքում, հայտարարեց՝ ադրբեջանցի զինվորը ձեռքին հրազեն է ունեցել, բայց դիմադրություն ցույց չի տվել:
Վարչապետը պնդեց, թե հստակ տեղեկություն չունի՝ նկարահանում եղել է, թե ոչ, բայց ասաց՝ կճշտի, կասի: Իր կարծիքով՝ կադրեր չեն հրապարակել այն պատճառով, որ զինվորը վնասվածքներ է ունեցել:
«Նախկին դեպքերը նկատի ունենալով՝ ես մեր գործընկերներին խնդրել եմ խուսափել նման կադրեր հրապարակելուց: Մի բան կարող եմ հիմա վստահ ասել, որ ադրբեջանցի զինվորը, որի ձեռքին եղել է հրազեն, դիմադրություն ցույց չի տվել ընդհանրապես: Ինչքան հասկանում եմ որոշակի վնասվածքներ է ունեցած եղել, գուցե դա է պատճառը, որ կադրեր չեն հրապարակվել», – մանրամասնեց վարչապետը: