Հայ դաշնակահար և կոմպոզիտոր Տիգրան Համասյանը Հարավային Կորեայում «Ջարասում ջազ» փառատոնում իր ելույթից առաջ խոսել է իր ստեղծագործության վրա հայկական ավանդական երաժշտության ազդեցության մասին, հայտնել է Հարավկորեական The Chosun Ilbo թերթը։
Համասյանի խոսքով՝ նա իրեն ավելի շատ համարում է պատմություններ պատմող և դրանց միջոցով իր տեսլականը փոխանցող ռեժիսոր, քան ավանդույթների պահապան։ Նա համատեղում է հայկական ժողովրդական երաժշտությունը ջազի, պրոգրեսիվ ռոքի և այլ ժանրերի հետ։
Երաժիշտը բացատրել է, որ մանկության տարիներին լսել է Black Sabbath, Whitesnake և Yes, իսկ հայկական ժողովրդական երաժշտությանը ծանոթացել է ջազի միջոցով, մասնավորապես՝ Յան Գարբարեկի և Ռալֆ Թաուների ստեղծագործությունները բացահայտելուց հետո։ Նա հայկական ժողովրդական պարերի էներգիան նկարագրում է որպես հևի մետալի (ծանր ռոք) էներգիա։
Երաժշտության նկատմամբ իր մոտեցման մասին խոսելով՝ Համասյանը շեշտել է, որ նվագելիս ռիթմերը չի հաշվում, այլ առաջնահերթություն է տալիս երաժշտության առաջացրած հույզերին։ Նա ասում է, որ երաժշտության նկատմամբ իր մոտեցումը շատ չի փոխվել Թելոնիուս Մոնկի անվան միջազգային ջազ դաշնակահարների մրցույթում հաղթելուց հետո 20 տարվա ընթացքում. նա դեռևս նվագում է «ինչպես երեխա»։
Փետրվարին Համասյանը թողարկել էր Manifeste ալբոմը, որը նվիրված էր իր կարիերայի 20-ամյակին: Ալբոմում նա ուսումնասիրում է արվեստի թեմաներ, պատերազմի մանկության հիշողություններ, արհեստական բանականության դարաշրջանի դարավոր ավանդույթներ և կրոնական փորձառություն։
Համասյանը ծնվել է Շիրակում և համարվում է ժամանակակից ջազի ամենաակնառու դաշնակահարներից մեկը: Նա հաղթել է Թելոնիուս Մոնկի անվան հեղինակավոր միջազգային ջազային դաշնակահարների մրցույթում 2006 թվականին՝ 19 տարեկան հասակում:
