Ամերիկացի հայազգի գործարար և ռեալիթի-շոուների աստղ, 45-ամյա Քիմ Քարդաշյանը The Sunday Times Style ամսագրին տված հարցազրույցում պատմել է, որ ստիպված է զսպել իր և երաժիշտ Քանյե Ուեսթի 13-ամյա դստեր՝ Նորթի՝ բոլոր հանրային նախագծերին մասնակցելու ձգտումը։
Քարդաշյանի խոսքով՝ դստեր ստացած առաջարկներից շատերը նա և Ուեսթը մերժում են։ Նա ընդգծել է, որ երաժշտական հարցերում ինքն ու Ուեսթը կարողանում են ընդհանուր հայտարարի գալ և միասին համաձայնեցնել այն բոլոր նախագծերը, որոնցում ներգրավվում է իրենց դուստրը։
Քարդաշյանը խոստովանել է, որ իրեն անհանգստացնում է, թե ինչպես է հայտնիությունն ազդում երեխաների վրա։ Նրա խոսքով՝ կրտսեր երեխաները երբեմն հայտնվում են ընտանեկան ռեալիթի-շոուի նկարահանումներին, բայց գրեթե չեն մասնակցում հիմնական սյուժեներին, մինչդեռ Նորթը սիրում է լինել ուշադրության կենտրոնում։
«Յուրաքանչյուր երեխա անում է այն, ինչն իր համար հարմար է»,- ասել է նա։
Քարդաշյանը նաև պատմել է, որ իրեն չորս երեխայի հարցում օգնում է հինգ դայակ՝ մեկն աշխատում է, մյուսները հերթափոխով են։ Միաժամանակ նա ինքն է երեխաներին տանում դպրոց և բերում, ամեն երեկո ընթրում նրանց հետ։
«Կարծում եմ՝ միջին խստության ծնող եմ։ Ես շատ համբերատար և սիրող եմ։ Երեխան դեռ կարող է քնել իմ անկողնում, եթե ուզում է։ Ամեն երեկո երեխաների համար գրքեր եմ կարդում»,- ասել է նա։
Քարդաշյանի խոսքով՝ Ուեսթից ամուսնալուծությունից հետո նա մոտ հինգ տարի գրեթե միայնակ է եղել, և այդ ժամանակը թույլ է տվել կենտրոնանալ երեխաների և իր համար կարևոր նախագծերի վրա։
