Իսպանիայի վարչապետ Պեդրո Սանչեսը հայտարարել է արտահերթ խորհրդարանական ընտրություններ անցկացնելու մասին։ Ազգին ուղղված հեռուստաուղերձում Սանչեսը հայտարարել է, որ անհրաժեշտ է «թարմացնել և ընդլայնել կառավարության հանդեպ ժողովրդի աջակցությունը»։ Նրա խոսքով՝ Իսպանիան պետք է «մոբիլիզացվի և ապահովի, որ խորհրդարանում ձևավորվի շատ ավելի լայն առաջադեմ մեծամասնություն»։
Վարչապետն իր ելույթը սկսել է՝ ընդգծելով վերջին տարիներին Իսպանիայի առջև ծառացած մի շարք ճգնաժամերը։
Սանչեսը դրական է գնահատել կոալիցիոն կառավարության գործունեությունը՝ նշելով երկրի տնտեսական աճը և կառավարության իրականացրած բարեփոխումները։ Նրա խոսքով՝ Իսպանիան «դարձել է խաղաղության, ֆեմինիզմի և բարգավաճման համաշխարհային օրինակ»։
Վերջին շաբաթներին Սանչեսի կառավարությունը բախվել է աճող քաղաքական ճնշման։ Իրավիճակն ավելի է սրվել այն բանից հետո, երբ կառավարությունը պարտություն է կրել բնակարանային ոլորտին վերաբերող կարևոր քվեարկությունում։
Կառավարության առաջարկները մշակվել էին համազգային բողոքի ակցիաների ֆոնին։ Դրանց պատճառներից մեկը 87-ամյա կնոջ վտարման դեպքն էր, որի բնակարանի վարձավճարը կտրուկ բարձրացվել էր, ինչի հետևանքով նա չէր կարողացել կատարել վճարումները։
Բնակարանների բարձր գներն ու վարձակալության թանկացումը վերջին շրջանում դարձել են Իսպանիայի հասարակական և քաղաքական օրակարգի գլխավոր խնդիրներից մեկը։
Մադրիդի կենտրոնում՝ Պուերտա դել Սոլ հրապարակում, ցուցարարները վրաններ են տեղադրել՝ պահանջելով մատչելի բնակարաններ և վարձակալների իրավունքների ավելի արդյունավետ պաշտպանություն։
