Ֆրանսիայի կրթության նախարարը կիրակի օրը հայտնել է, որ երկուշաբթի օրը Ֆրանսիայի տարածքում մասնակի կամ ամբողջությամբ կփակվեն մինչև 500 դպրոցներ՝ վերջին օրերին ոստիկանության հատուկ ստորաբաժանումների և բողոքող աշակերտների միջև տեղի ունեցած բախումների պատճառով։
Դասերը «ամբողջությամբ կամ մասնակիորեն կդադարեցվեն» մոտ «400-ից 500» ավագ դպրոցներում, քանի որ անվտանգության պայմանները «չեն ապահովվել»,-նշել է Էդուարդ Ժեֆրեն։
Նա նաև հայտնել է, որ բողոքի ակցիաների մեկնարկից ի վեր 24 դպրոց «այրվել կամ թալանվել է»։
Հազարավոր աշակերտներ բողոքի ակցիաներ են իրականացնում՝ բողոքելով կրթական չափանիշների դեմ․ անցյալ շաբաթ սկսված բողոքի ալիքը Փարիզից տարածվել է նաև այլ քաղաքներ, այդ թվում՝ Մոնպելյե, Նանտ և Մարսել։
Ավագ դպրոցի աշակերտներն իրենց դժգոհությունն են հայտնում ուսուցիչների պակասի, դասարանների գերծանրաբեռնվածության և շենքերի անմխիթար վիճակի կապակցությամբ։
Ուրբաթ օրը Ֆրանսիայի արդարադատության նախարար Ժերալդ Դարմանինը հայտնել էր, որ բողոքի ակցիաներից տուժել է Ֆրանսիայի 3700 դպրոցներից 735-ը։
Ֆրանսիայի ներքին գործերի նախարար Լորան Նունյեսի տվյալներով՝ ուրբաթ օրը ձերբակալվել է 1747 մարդ։
Ըստ AFP-ի՝ բողոքի ցույցերի կազմակերպիչները կոչ են արել շարունակել ցույցերը երեքշաբթի օրը՝ կառավարությանը մեղադրելով «կոնկրետ միջոցառումների» չիրականացնելու մեջ։
Կիրակի օրը Ֆրանսիայի վարչապետ Սեբաստիան Լեկորնուն հայտարարել է, որ իր կառավարությունը հետագա քայլեր է ձեռնարկում «ավագ դպրոցի աշակերտների և կրթական անձնակազմի առջև ծառացած դժվարությունները լուծելու համար»։