Շաբաթավերջին Թեսաղոնիկէի մէջ (Յունաստան) սկսաւ կրտսերներու, պատանիներու եւ երիտասարդներու Սամպոյի աշխարհի ախոյեանութիւնը:
Առաջին օրուան մրցումներուն, «ՓԱՕՔ սփորթց Արենա»-ին մէջ պատանիներու (16-էն 18 տարեկան) ախոյեանութեան մրցումները տեղի ունեցան:
Հայաստանի հաւաքականը երեք մետալ ձեռք ձգեց` երկու արծաթէ եւ մէկ պրոնզէ մետալ:
Մինչեւ 58 քկ կշիռի մրցումներուն, Նարեկ Սիմոնեան հասաւ աւարտական, բայց չկրցաւ պարտութեան մատնել Ռուսիոյ ներկայացուցիչ Ալի Ցէյը:
Մինչեւ 64 քկ կշիռի մրցումներուն, Յակոբ Ումրշադեան իր կարգին հասաւ աւարտական եւ առաջին դիրքը զիջեցաւ այլ ռուս ներկայացուցիչի մը` Նիքիթա Սթրելցովին:
Մինչեւ 71 քկ կշիռի մրցումներուն, Գոռ Շատվերեան բարձրացաւ պատուոյ հարթակի երրորդ աստիճան: Այս կշիռի կարգին մէջ ալ ոսկի մետալակիր դարձաւ ռուս ներկայացուցիչ Ամին Երմոլայեւ, մինչ արծաթ մետալը բաժին ինկաւ վրացի Լուքա Նանավանի:
Ախոյեանութեան երկրորդ օրուան մրցումներուն պայքարեցան երիտասարդները (միչեւ 20 տարեկան):
Մարզական սամպոյի մրցումներուն երրորդ դիրքը գրաւեցին Ալեքս Խաչատրեան (58 քկ), Մհեր Օհանեան (71 քկ) եւ Սէյրան Սարուխանեան (88 քկ):
Մարտական Սամպոյի մրցումներուն պրոնզէ մետալներ շահեցան նաեւ Գագիկ Գրիգորեան (58 քկ), Միքայէլ Թումասեան (64 քկ) եւ Վիգէն Աւագեան (71 քկ): Երկու օրերուն Հայաստան արդէն 9 մետալներ շահած է` 2 արծաթէ եւ 7 պրոնզէ: Յաջորդ օրուան մրցումներուն պիտի մասնակցին կրտսերները: