Iravaban.net–ը ուսումնասիրել է կառավարության որոշման նախագիծը, որով առաջարկվում է «Հանրակացարաններ» ՊՈԱԿ-ի կողմից փախստականների բնակեցման նպատակով օգտագործված գույքը «Օթևան» ՊՈԱԿ-ին տրամադրել անհատույց և անժամկետ օգտագործման իրավունքով։
Ի՞նչ գույք է տրամադրվելու
Նախագծով նախատեսվում է ՀՀ տարածքային կառավարման և ենթակառուցվածքների նախարարության պետական գույքի կառավարման կոմիտեին ամրացված այն գույքը, որն օգտագործվել է «Հանրակացարաններ» ՊՈԱԿ-ի կողմից փախստականների բնակեցման նպատակով, տրամադրել ՀՀ աշխատանքի և բարեկեցության նախարարության ենթակայությամբ գործող «Օթևան» ՊՈԱԿ-ին։
Գույքը նախատեսվում է օգտագործել որպես պետական սոցիալական բնակարանային ֆոնդ և Հայաստանում ապաստան ստացած փախստականներին սոցիալական աջակցության ծառայությունների տրամադրումը կազմակերպելու նպատակով։
Ինչո՞ւ է գույքը փոխանցվելու «Օթևան»-ին
«Հանրակացարաններ» ՊՈԱԿ-ը մինչև 2023 թվականը գտնվել է ՀՀ տարածքային կառավարման և զարգացման նախարարության Միգրացիոն ծառայության ենթակայության ներքո և զբաղվել է Հայաստանում փախստական ճանաչված և ապաստան ստացած անձանց հանրակացարանային սենյակներում բնակեցմամբ։
2023 թվականին կազմակերպությունը հանձնվել է ՀՀ աշխատանքի և բարեկեցության նախարարության ենթակայությանը, իսկ 2026 թվականի փետրվարի 1-ից լուծարվել է՝ կառավարության 2025 թվականի նոյեմբերի 20-ի N 1659-Ա որոշման համաձայն։
Ներկայում պետական սոցիալական բնակարանային ֆոնդի կացարաններում բնակվելու իրավունք ունեցող անձանց բնակեցումը և սոցիալական ծառայությունների տրամադրումը կազմակերպվում է «Օթևան» ՊՈԱԿ-ի միջոցով։
Ի՞նչ է նախատեսվում անել գույքի հետ
Նախագծով առաջարկվում է գույքը «Օթևան» ՊՈԱԿ-ին տրամադրել անհատույց, անժամկետ օգտագործման իրավունքով։
Այն նախատեսվում է օգտագործել՝
- պետական սոցիալական բնակարանային ֆոնդի նպատակներով,
- Հայաստանում ապաստան ստացած փախստականներին կացարանով ապահովելու համար,
- նրանց սոցիալական աջակցության ոլորտի ծառայությունների տրամադրումը կազմակերպելու նպատակով։
Ի՞նչ ժամկետ է սահմանվելու
Որոշումն ուժի մեջ մտնելուց հետո պետական գույքի կառավարման կոմիտեին առաջարկվում է մեկամսյա ժամկետում «Օթևան» ՊՈԱԿ-ի հետ կնքել գույքն անհատույց և անժամկետ օգտագործման հանձնելու պայմանագրերը։
Միաժամանակ առաջարկվում է ուժը կորցրած ճանաչել կառավարության 2025 թվականի նոյեմբերի 20-ի N 1659-Ա որոշման 4-րդ կետը։
Պետական բյուջեից լրացուցիչ գումար կտրամադրվի՞
Նախագծի ընդունման դեպքում լրացուցիչ ֆինանսական միջոցներ անհրաժեշտ չեն։ Պետական բյուջեի եկամուտների և ծախսերի փոփոխություններ չեն ակնկալվում։
Ո՞վ է մշակել նախագիծը
Նախագիծը մշակվել է ՀՀ աշխատանքի և բարեկեցության նախարարության կողմից։
Նախագծի ընդունմամբ նախատեսվում է ապահովել Հայաստանում ապաստան ստացած փախստականներին կացարանով ապահովման և սոցիալական աջակցության ծառայությունների կազմակերպումը։
-տեղեկացնում է Iravaban.net–ը։