Ռուսական զորքերը երրորդ օրն անընդմեջ հարվածում են Կիևի Դնեպր գետի վրայով անցնող կամուրջներին։ Այսօր առավոտյան Կիևի քաղաքապետ Վիտալի Կլիչկոն հայտարարել է, որ այս անգամ հարված է հասցվել Հյուսիսային կամուրջին (մինչև 2018 թվականը հայտնի էր որպես Մոսկովյան կամուրջ)։
Կլիչկոյի խոսքով՝ այս կամրջի վրա ավտոճանապարհը և տրոլեյբուսային օդային գծերը վնասվել են։ Դնեպրի ձախ ափից աջ երթևեկությունը ժամանակավորապես կասեցվել է։
Ավելի ուշ Կիևի քաղաքային պետական վարչությունը հայտնել է, որ Հյուսիսային կամրջի վրա հարձակման պատճառով կասեցված ավտոբուսային երթուղիները վերսկսել են աշխատանքը՝ որոշ ուշացումներով։
Ճարտարապետական տեսարժան վայր հանդիսացող Հյուսիսային կամուրջը կապում է Ուկրաինայի մայրաքաղաքի աջ ափի շրջանները Ռադուժնի, Վիգուրիվշչինա-Տրոյեշչինա և Վոսկրեսենկա բնակելի թաղամասերի հետ։
Երկու օրում հինգ հարված՝ Հարավային կամրջին
Հոկտեմբերի 1-2-ը ռուսական զորքերը հինգ անօդաչու թռչող սարքով հարված են հասցրել Կիևի մեկ այլ՝ Հարավային կամրջին, որը համարվում է մայրաքաղաքի աջ և ձախ ափերը կապող կարևոր տրանսպորտային զարկերակը։ Այն ներկայումս փակ է երթևեկության և մետրոյի համար։ Քաղաքային իշխանությունները սպասում են կամրջի վիճակի փորձագիտական գնահատականներին՝ մետրոյի աշխատանքը վերսկսելուց առաջ։