ՀՀ վարչապետ Նիկոլ Փաշինյանի՝ խաղաղության համաձայնագրի ստորագրումն ու վավերացումը կառավարության առաջնահերթություններից մեկը դարձնելու մասին հայտարարությունից մեկ օր անց Բաքուն կրկին ՀՀ Սահմանադրության փոփոխությունը պայման է անվանել վերջնական խաղաղության համաձայնագրի ստորագրման համար, հայտնում են ադրբեջանական լրատվամիջոցները։
Ադրբեջանի նախագահի օգնական, նախագահի աշխատակազմի արտաքին քաղաքականության հարցերի բաժնի ղեկավար Հիքմեթ Հաջիևը Բաքվում անցկացվող CAMCA 2026 տարածաշրջանային համաժողովում հայտարարել է, որ, Ադրբեջանի գնահատմամբ, Հայաստանի Սահմանադրությունում կան Ադրբեջանի նկատմամբ տարածքային պահանջներ։
Նրա խոսքով՝ դրանց վերաբերող փոփոխություններից հետո վերջնական խաղաղության համաձայնագրի ստորագրումը հնարավոր կդառնա։
Հաջիևը նաև հայտարարել է, որ տարածաշրջանում խաղաղություն արդեն հաստատվել է, սակայն անհրաժեշտ է ապահովել դրա կայունությունը։
Հոկտեմբերի 1-ին կառավարության նիստում Փաշինյանը հայտարարել էր, որ տնտեսական ցուցանիշները, իր գնահատմամբ, վկայում են խաղաղության նկատմամբ քաղաքացիների վստահության մասին։
«Խաղաղության համաձայնագրի ստորագրումն ու վավերացումը […] պետք է լինի մեր ռազմավարական առաջնահերթություններից մեկը։ Մարդիկ պետք է տեսնեն, որ մենք իրենց այս սպասումը որպես քաղաքական կապիտալ վերցնում ենք և հասցնում մինչև վերջ»,- ասել էր վարչապետը։
Բաքուն Հայաստանի Սահմանադրության փոփոխությունը որպես խաղաղության համաձայնագրի ստորագրման պայման հրապարակայնորեն առաջ է քաշում առնվազն 2024 թվականի փետրվարից։ Այն ժամանակ Ադրբեջանի նախագահ Իլհամ Ալիևը հայտարարել էր, որ Հայաստանի Սահմանադրությունում և այլ իրավական փաստաթղթերում, ըստ Բաքվի, Ադրբեջանի նկատմամբ տարածքային պահանջներ կան։
Ավելի ուշ Ալիևը բազմիցս կրկնել է այս պահանջը՝ Սահմանադրության փոփոխությունն անվանելով խաղաղության համաձայնագրի ստորագրման պայման։
Երևանը, իր հերթին, հայտարարել է, որ Ադրբեջանի Սահմանադրությունում ևս Հայաստանի նկատմամբ տարածքային պահանջներ է տեսնում, սակայն դրա փոփոխությունը որպես խաղաղության պայման չի պահանջում։
Հայկական կողմը նաև հղում է անում համաձայնագրի դրույթներին, որոնցով կողմերը ճանաչում են միմյանց տարածքային ամբողջականությունը և հաստատում փոխադարձ տարածքային պահանջների բացակայությունը։
Հայտարարությունը հնչել է Հայաստանում նոր Սահմանադրության մշակման ֆոնին։ Փաշինյանի խոսքով՝ դրա տեքստը կհրապարակվի առաջիկա ամիսներին։
