ԿԱՐՕ Կ.
Երէկ հայաստանեան լրատուական կայք մը բացի, եւ դիմացս ելաւ բաւական երկար լուր մը, որ կ՛անդրադառնար Երեւանի բանակայիններու խմբապետ եւ այժմ Հայաստանի ազգային խումբին հետ լաւ ելոյթներ ունեցող Արգիշտի Պետրոսեանին:
Հետաքրքրականը այն է, որ նիւթը հրապարակած լրագրողը նշած է, որ Պետրոսեան անսովոր ճանապարհ մը կտրած է` հասնելու համար հաւաքական: Ան իր սերունդի գլխաւոր տաղանդներէն մէկը չէր նկատուած, երբեք բարձր գինով փոխանցումի արժէք չէ ունեցած, չէ խաղցած Հայաստանէն դուրս եւրոպական գլխաւոր լիկաներէն մէկուն մէջ եւ իր ասպարէզը միայն հայկական խումբերու անցուցած է:
Լրագրողը նոյնիսկ տեղադրած էր Արգիշտիի նկարը` ՀՄԸՄ-ի ներկայացուցչական խումբին շապիկով` նշելով, որ ՀՄԸՄ-ի խումբը պայքարած էր բարձրանալու առաջին դասակարգ (2015-ին) եւ մէկ կէտով ետ մնացած Սաժեսէն:
Արգիշտի Լիբանանի մէջ աւելի համակիր ունեցած էր եւ ծանօթ, քան հայրենիքի մէջ: Ան օրինակելի մարզիկ մըն էր, եւ շնորհիւ իր նուիրումին կրցաւ վերադառնալէ ետք խաղալ Արարատի հետ, ապա միացաւ Արցախ խումբին, որ աւելի ուշ Նոա կոչուեցաւ այնուհետեւ` Երեւան խումբին հետ:
Այդ օրերուն ազգային խումբը հեռու կը թուէր ըլլալ, բայց ան վերադարձաւ բարձրագոյն դասակարգ Վանի հետ: 29 տարեկանին ան միացաւ Երեւանի բանակայիններուն, որ աւանդաբար կը բաղկանար երիտասարդ ֆութպոլիստներէ, որոնք 18-էն 20 տարեկանին կը ծառայէին բանակին: Ան ոչ միայն խումբին խմբապետն էր, այլ նաեւ իր շուրջի երիտասարդ տղոց օրինակ կը դառնար եւ կ՛օգնէր անոնց զարգացման:
Ան իր կարգին յառաջացաւ իր խմբակիցներուն հետ` մոռնալով իր տարիքը:
Եղիշէ Մելիքեանի նշանակումէն ետք, Արգիշտի հրաւիրուեցաւ ազգային խումբ եւ Լաթվիոյ դէմ առիթ ունեցաւ դաշտ ներկայանալ 33 տարեկան 11 ամսական տարիքով` փոխարինելով վիրաւոր Խուլիօ Պուենոն:
Ան օգնեց խումբին անառիկ պահել (Լաթվիոյ դէմ) իր բերդը, եւ նոյնիսկ երկրորդ մրցումին տուաւ իր լաւագոյնը, հակառակ անոր որ Մոնթենեկրօ յաղթեց (3-2): Արգիշտի ոչ մէկ սխալ գործեց, կրցաւ լաւ ձեւով պաշտպանել, 10 անգամ մրցակիցէ հեռացնել գնդակը եւ սփրինթի պահուն արձանագրել 33,4 քմ ժամական արագութիւն, որ ունի Քրիսթանօ Ռոնալտոն:
16 հոկտեմբերին Պետրոսեան 34 տարեկան պիտի դառնայ, բայց ան իր նուիրումով տարիներու աշխատանքով դարձաւ օրինակ ամբողջ աշխարհի հայորդի ֆութպոլիստներուն, որ ամէն անձ կրնայ հասնիլ իր նպատակին, եւ տարիքը բնաւ արգելք չէ: