Սյունիքի մարզի Շաքի բնակավայրում տեղի ունեցած միջադեպից նոր մանրամասներ են հայտնի դարձել։ Sputnik Արմենիայի հետ զրույցում տեղի բնակիչներից մեկը պատմել է, որ ադրբեջանցի զինծառայողն օգտվել է տանտերերի բացակայությունից և գիշերն անցկացրել նրանց տանը։
«Կինն ու 3 երեխաները տանը չեն գիշերել: Դպրոցից հետո կինը երեխաների հետ տուն է վերադարձել, նկատել ադրբեջանցուն և աղմուկ բարձրացրել, ինչից հետո վերջինս կրակել է նրա վրա»,- հայտնել է գյուղացին։
Ըստ աղբյուրի՝ հրազենային վիրավորում ստացած կինը դիմել է ինքնապաշտպանության և դանակով հարվածել հարձակվողին: Ադրբեջանցի զինծառայողը փախուստի է դիմել ու թաքնվել անասնագոմում, որտեղ էլ հետագայում հայտնաբերվել և ձերբակալվել է:
Ըստ լուրերի՝ ադրբեջանցի զինվորն արդեն 3 օր է Սյունիքի մարզում է, թեև դրա մասին պատկան մարմինները լռել են, թաքցրել թշնամու ներթափանցումը Հայաստանի սահմանից ներս՝ դրանով իսկ վտանգելով ՀՀ քաղաքացիների կյանքն ու առողջությունը։