ԱՄՆ նախագահի վարչակազմը սեպտեմբերի 29-ին գործարկել է America.gov նոր կայքը, որը նախատեսված է քաղաքացիներին պետական տեղեկատվության, ծառայությունների և վարչական գործընթացների վերաբերյալ տեղեկություններ ստանալու հարցում օգնելու համար։ Կայքում ներդրված է արհեստական բանականությամբ աշխատող չաթ-բոտ, որի միջոցով օգտատերերը կարող են հարցեր տալ պետական ծառայությունների և ծրագրերի վերաբերյալ, հայտնում է Axios-ը։
Կայքը միավորում է շուրջ 29 հազար դաշնային պետական կայքերի տեղեկատվությունը մեկ հարթակում։ Օգտատերը կարող է, օրինակ, հարցնել, թե ինչպես փոխել հասցեն ԱՄՆ փոստային ծառայությունում, և համակարգը կձևավորի համապատասխան պատասխան։ Կայքից օգտվելու համար հաշիվ ստեղծել չի պահանջվում։
Միաժամանակ, կայքի պատասխանները ստեղծվում են արհեստական բանականության միջոցով, ուստի օգտատերերին խորհուրդ է տրվում կարևոր տեղեկությունները ստուգել համապատասխան պետական մարմինների պաշտոնական աղբյուրներում։