Ադրբեջանն ու Բելառուսը Բաքվում անցկացվող միջազգային պաշտպանական ցուցահանդեսի շրջանակում քննարկել են տեխնոլոգիաների փոխանակումն ու ժամանակակից ռազմական նշանակության արտադրանքի փոխադարձ մատակարարումների ընդլայնումը, ՏԱՍՍ-ի փոխանցմամբ՝ հայտնել է Բելառուսի ռազմարդյունաբերական պետական կոմիտեն։
Բանակցությունները վարել են Ադրբեջանի պաշտպանության նախարար Զաքիր Հասանովը և Բելառուսի ռազմարդյունաբերական պետական կոմիտեի նախագահ Դմիտրի Պանտուսը։
Բանակցությունների առանցքում էին ռազմատեխնիկական համագործակցությունը, համատեղ նախագծերն ու արդյունաբերական հետագա կոոպերացիան։
Բելառուսական գերատեսչությունից հայտնել են, որ բանակցությունները շարունակել են բելառուսա-ադրբեջանական նախորդ բարձր մակարդակի հանդիպումներում ձեռք բերված պայմանավորվածությունները։
Ավելի վաղ Հասանովն ու Բելառուսի պաշտպանության նախարար Վիկտոր Խրենինը ևս քննարկել էին ռազմական և ռազմատեխնիկական համագործակցության զարգացման հեռանկարները։
2024 թվականի հունիսին Politico-ն հայտնել էր, որ Բելառուսը 2018-2022 թվականներին առաջատար սպառազինություն է մատակարարել Ադրբեջանին, ինչը Բաքվին առավելություն է տվել Հայաստանի հետ ռազմական հակամարտությունում։ Նույն թվականի հունիսի 13-ին վարչապետ Նիկոլ Փաշինյանը Բելառուսի նախագահից պահանջել էր ներողություն խնդրել հայ ժողովրդից՝ 2020 թվականի 44-օրյա պատերազմի ժամանակ Ադրբեջանին աջակցելու մասին հայտարարությունների համար։
Բելառուսը Հայաստանի դաշնակիցն է ՀԱՊԿ-ում, սակայն Երևանի մասնակցությունը կազմակերպությանը փաստացի սառեցված է։ 2024 թվականի մարտին Փաշինյանը հայտարարել էր, որ Հայաստանը չի մասնակցում ՀԱՊԿ-ի բարձր և բարձրագույն մակարդակի միջոցառումներին։ Նույն տարվա հունիսին Փաշինյանը հայտարարել էր, որ չի այցելի Բելառուս, քանի դեռ երկրի նախագահը Ալեքսանդր Լուկաշենկոն է, և որ հայ պաշտոնյաները ևս չեն մեկնի այդ երկիր։
