Iravaban.net-ը ուսումնասիրել է «Հայաստանի Հանրապետության կրթության, գիտության, մշակույթի և սպորտի նախարարի 2021 թվականի նոյեմբերի 29-ի N 81-Ն հրամանում փոփոխություն կատարելու մասին» ՀՀ կրթության, գիտության, մշակույթի և սպորտի նախարարի հրամանի նախագիծը։
Նախագծով առաջարկվում է վերանայել հանրակրթական ուսումնական հաստատությունների սովորողներին դասագրքերի տրամադրման արտոնությունից օգտվող սոցիալապես անապահով ընտանիքների շրջանակը։
Գործող կարգավորմամբ արտոնությունից օգտվող սովորողների շրջանակը սահմանվում է «Ընտանիքների անապահովության գնահատման համակարգում հաշվառված կամ պետության կողմից իրականացվող սոցիալական աջակցության ծրագրերում ընդգրկված» լինելու հանգամանքով։
Նախագծով առաջարկվում է կիրառել ավելի հստակ և միասնական չափանիշ՝ արտոնությունը պայմանավորելով ընտանիքի մեկ հաշվարկային անդամի՝ անապահովության նպաստ ստանալու իրավունք տվող սահմանային շեմի 160 տոկոսի արժեքից ցածր ամսական եկամուտ ունենալու և ընտանիքի անապահովության գնահատման կարգով սոցիալապես անապահով ճանաչված լինելու հանգամանքներով։
Ի՞նչ է փոխվելու
Դասագրքերի տրամադրման արտոնությունից օգտվողների շրջանակը կկապվի ընտանիքի անապահովության գնահատման գործող համակարգում կիրառվող եկամտային չափանիշի և ընտանիքի սոցիալապես անապահով ճանաչված լինելու հանգամանքի հետ։
Այսինքն՝ գործող «Ընտանիքների անապահովության գնահատման համակարգում հաշվառված կամ պետության կողմից իրականացվող սոցիալական աջակցության ծրագրերում ընդգրկված» ձևակերպումը կփոխարինվի ընտանիքի մեկ հաշվարկային անդամի՝ անապահովության նպաստ ստանալու իրավունք տվող սահմանային շեմի 160 տոկոսի արժեքից ցածր ամսական եկամուտ ունենալու և ընտանիքի սոցիալապես անապահով ճանաչված լինելու պայմանով։
Ո՞վքեր կարող են օգտվել արտոնությունից
Արտոնությունից կօգտվեն այն սոցիալապես անապահով ընտանիքների երեխաները, որոնց ընտանիքի մեկ հաշվարկային անդամի ամսական եկամուտը ցածր է անապահովության նպաստ ստանալու իրավունք տվող սահմանային շեմի 160 տոկոսի արժեքից, և ընտանիքը սոցիալապես անապահով է ճանաչվել ընտանիքի անապահովության գնահատման կարգով։
Ինչո՞ւ է անհրաժեշտ փոփոխությունը
Նախագծի հիմնավորմամբ՝ գործող կարգավորմամբ շահառուների շրջանակի որոշման հիմքում ընկած չափանիշները բավարար չափով հստակեցված չեն, ինչը կարող է հանգեցնել դասագրքերի տրամադրման արտոնության կիրառման ընթացքում տարբեր մեկնաբանությունների։
Առաջարկվող կարգավորմամբ նախատեսվում է սահմանել հստակ, միասնական և օբյեկտիվ չափանիշներ։
Ի՞նչ արդյունք է ակնկալվում
Նախագծի ընդունմամբ ակնկալվում է սոցիալապես անապահով ընտանիքների երեխաներին դասագրքերի տրամադրման արտոնության կիրառման միասնական և հստակ չափանիշների սահմանում, շահառուների շրջանակի առավել հասցեական որոշում և դասագրքերով ապահովման գործընթացի արդյունավետության բարձրացում։
Կավելանա՞ պետական բյուջեի ծախսը
Նախագծի ընդունումը չի նախատեսում պետական բյուջեի ծախսերի ավելացում։
Նախագծի ընդունմամբ այլ իրավական ակտերում փոփոխություն կատարելու անհրաժեշտություն նույնպես չի առաջանում։
Ե՞րբ կմտնի ուժի մեջ հրամանը
Նախագծով նախատեսվում է, որ հրամանն ուժի մեջ կմտնի պաշտոնական հրապարակմանը հաջորդող օրվանից։
Իրավական ակտի մշակման գործընթացում ներգրավված մարմինը ՀՀ կրթության, գիտության, մշակույթի և սպորտի նախարարությունն է։