Թաիլանդում առնվազն ութ մարդ է զոհվել երկարատև հորդառատ անձրևների հետևանքով առաջացած ջրհեղեղների պատճառով։ Այս մասին հայտնել է Thai PBS հեռուստաալիքը։
Աղետների կանխարգելման և հետևանքների վերացման դեպարտամենտի տվյալներով՝ աղետի գոտում է հայտնվել 174,8 հազար տնտեսություն կամ մոտ 545 հազար մարդ։ Ամենաշատ զոհերը գրանցվել են Սակեու նահանգում, որտեղ զոհվել է հինգ մարդ։ Եվս երկու մարդ զոհվել է Չանտհաբուրիում, մեկը՝ Սարաբուրիում։ Այս շրջանները հեռու են զբոսաշրջային հիմնական երթուղիներից։ Թաիլանդի իշխանությունները օտարերկրյա զբոսաշրջիկների շրջանում հնարավոր զոհերի մասին չեն հայտնել։
Ջրհեղեղները տարածվել են երկրի 25 նահանգների 128 շրջաններում։ Ամենածանր իրավիճակը կենտրոնական և արևելյան շրջաններում է։
Ջրհեղեղ է տեղի ունեցել նաև Բանգկոկում, որը իշխանությունները հայտարարել են աղետի գոտի։ Թաիլանդի մայրաքաղաքում տարերային աղետի հետևանքները վերաբերել են շուրջ 329 հազար տնտեսության կամ մոտ 700 հազար մարդու։ Քաղաքային իշխանությունները մոբիլիզացնում են ռեսուրսները՝ փողոցներից ջուրը հեռացնելու համար։
Անձրևների դադարից հետո Բանգկոկում իրավիճակը կայունացել է։ Մայրաքաղաքում զոհերի մասին տեղեկություններ չեն հաղորդվել։