26 Սեպտեմբերի 2026, 12:30
Գուրգեն Մարգարյանը ծնվել է 1978 թվականի սեպտեմբերի 26-ին Երևանում։ Սովորել է մայրաքաղաքի Ա. Ս. Գրիբոյեդովի անվան թիվ 122 դպրոցում, այնուհետև ընդունվել Հայաստանի պետական ճարտարագիտական համալսարան, որն ավարտել է՝ ստանալով ինժեներական գիտությունների բակալավրի աստիճան։ Նրան բնորոշ էին կարգապահությունը, բարձր նպատակասլացությունն ու շրջապատի նկատմամբ հարգալից վերաբերմունքը։
1999-2001 թվականներին պարտադիր զինվորական ծառայությունն անցնելուց հետո Գուրգենը որոշել է իր կյանքը կապել հայրենիքի պաշտպանության հետ և շարունակել ծառայությունը Զինված ուժերում՝ ստանալով ՀՀ պաշտպանության նախարարության լեյտենանտի սպայական կոչում։ 2004 թվականի հունվարին լեյտենանտ Մարգարյանը մեկնել է Հունգարիա՝ մասնակցելու ՆԱՏՕ-ի «Գործընկերություն հանուն խաղաղության» ծրագրի շրջանակում անցկացվող եռամսյա անգլերեն լեզվի դասընթացներին։ Ծրագիրն անցկացվում էր Բուդապեշտում և համախմբում էր տարբեր երկրների, այդ թվում՝ Հայաստանի և Ադրբեջանի երիտասարդ սպաների։
2004 թվականի փետրվարի 19-ին տեղի է ունեցել ողբերգություն, որը ցնցել է միջազգային հանրությանը։ Վաղ առավոտյան ադրբեջանցի սպա Ռամիլ Սաֆարովը ներխուժել է հանրակացարանի սենյակ և առանձնակի դաժանությամբ հարձակվել քնած 25-ամյա հայ լեյտենանտի՝ Գուրգեն Մարգարյանի վրա։ Էթնիկ ատելության հիմքով կատարված հանցագործությունը լայն արձագանք է գտել:
Բուդապեշտի քաղաքային դատարանը Սաֆարովին ճանաչել է մեղսունակ և դատապարտել ցմահ ազատազրկման՝ առաջին 30 տարիներին համաներման իրավունք չնախատեսելով։ Սակայն 2012 թվականին Հունգարիայի իշխանությունները դատապարտյալին արտահանձնել են Ադրբեջանին, որտեղ նրան անմիջապես ներում են շնորհել, զինվորական կոչումը բարձրացվել է մինչև մայորի, և նա հռչակվել է հերոս։ Որոշումը միջազգային մակարդակով մեծ արձագանք է առաջացրել և հանգեցրել Հայաստանի ու Հունգարիայի միջև դիվանագիտական հարաբերությունների դադարեցմանը։
Լեյտենանտ Գուրգեն Մարգարյանը զինվորական պատիվներով հուղարկավորվել է Երևանի «Եռաբլուր» զինվորական պանթեոնում։ Ծառայությանը նվիրվածության համար Հայաստանի Հանրապետության նախագահի հրամանագրով նա հետմահու պարգևատրվել է «Հայրենիքին մատուցած ծառայությունների համար» մեդալով։
Գուրգեն Մարգարյանի հիշատակը շարունակում է ապրել հասարակության մեջ․ նրա անունով են կոչվել հասարակական կազմակերպություն և ուսումնական լսարաններ, իսկ 2013 թվականի սեպտեմբերին Երևանում՝ Լենինգրադյան փողոցի հարակից պուրակում, հանդիսավորությամբ բացվել է նրա հուշարձան-հուշակոթողը։ Գուրգեն Մարգարյանի պատմությունը շարունակում է ընկալվել որպես սպայական արժանապատվության և հայրենիքին ծառայելու խորհրդանիշ։