ՄԱԿ-ի Ընդհանուր ժողովի քուլիսային հանդիպումներուն ծիրին մէջ վարչապետ Նաուաֆ Սալամ երէկ հանդիպում մը ունեցաւ Փաքիստանի իր պաշտօնակիցին` Մոհամետ Շահպազ Շերիֆի հետ:
Խօսակցութեանց առանցքը կազմեցին շրջանին մէջ շարունակուող իրանեւամերիկեան հակամարտութիւնն ու իսրայէլեան յարձակումները Լիբանանի, յատկապէս` հարաւային շրջաններուն ուղղութեամբ:
Այս առիթով վարչապետ Սալամ անհրաժեշտ նկատեց Իսրայէլի դէմ ճնշումներու բանեցման շարունակութիւնը` ապահովելու համար անոր ուժերուն հեռացումը լիբանանեան գրաւեալ տարածքներէն:
Սալամ–Մատպուլի Հանդիպում
Վարչապետ Նաուաֆ Սալամ ՄԱԿ-ի Ընդհանուր ժողովի նիստերուն զուգահեռ երէկ շարունակեց իր քուլիսային հանդիպումները շրջանային թէ միջազգային զանազան երկիրներու ղեկավարներուն հետ:
Այս ծիրին մէջ Սալամ տեսակցեցաւ նաեւ Եգիպտոսի իր պաշտօնակիցին` Մուսթաֆա Մատպուլիի հետ: Անոնք միասնաբար պարզեցին շրջանի ու յատկապէս Լիբանանի ապահովական նորագոյն իրադարձութիւնները:
Այս առիթով հարաւային Լիբանանի ուղղութեամբ շարունակուող իսրայէլեան յարձակումները յատուկ կարեւորութեամբ նշուեցան` ընդգծելով յարձակումներու կասեցումը, իսրայէլեան ուժերու անյապաղ հեռացումը հարաւային Լիբանանի գրաւեալ տարածքներէն եւ կայունութեան ամրապնդումը: