Լատվիայի հավաքական գլխավոր մարզիչ Պաոլո Նիկոլատոն Հայաստանի հավաքականի հետ խաղից առաջ տեղի ունեցած մամուլի ասուլիսում հայտարարել է, որ իր թիմը պետք է դիմանա ֆիզիկական պայքարին և ավելի արդյունավետ գործի հարձակման գծում։
«Այստեղ հաղթելը հաստատ հեշտ չի լինի։ Բոլորն ուզում են հաղթել։ Մենք վճռական ենք երեք միավոր վաստակելու հարցում, և կարծում եմ՝ հայերն էլ նույն նպատակն ունեն։ Առաջին հերթին պետք է ֆիզիկապես մրցունակ լինենք, ապա հետևենք մեր ռազմավարությանը։ Պետք է ավելի մեծ ուշադրություն դարձնենք հարձակմանը. երբ գոլային պահեր ենք ստեղծում, հարկավոր է դրանք օգտագործել»,-ասել է Նիկոլատոն։
Մարզիչը նշել է, որ հանդիպմանը պատրաստվելու համար Լատվիայի հավաքականն ընդամենը մի քանի օր է ունեցել։ Նրա խոսքով՝ Հայաստանի հավաքականի կադրային խնդիրները չեն փոխել հյուրերի նախապատրաստական ծրագրերը։ Միևնույն ժամանակ Լատվիայի թիմում նույնպես բացակայողներ կան։