Հայաստանի ֆուտբոլի ազգային հավաքականը հաղթանակի է տրամադրված Լատվիայի դեմ Ազգերի լիգայի մեկնարկային խաղից առաջ, նախախաղային ասուլիսում հայտարարել է հավաքականի գլխավոր մարզիչ Եղիշե Մելիքյանը։
«Չի կարելի խաղից առաջ ասել, որ հաղթելու ենք, բայց մենք տրամադրված ենք հաղթանակի և վստահություն ունենք»,- նշել է մարզիչը։
Մելիքյանը հայտնել է, որ Լատվիայի խաղը վերլուծելուց հետո մարզչական շտաբը գտել է մրցակցին հակազդելու տարբերակը։
Մելիքյանը նաև կոչ է արել երկրպագուներին աջակցել թիմին։
«Կուզենայի, որ երկրպագուն էլ զգար այն, ինչ ես եմ զգում՝ վստահել, հավատալ և հպարտանալ»,- ասել է նա։
Հավաքականի ավագ Էդուարդ Սպերցյանն իր հերթին նշել է, որ թիմում մարտական տրամադրություն է։
«Առջևում չորս խաղ ունենք, բարդ գրաֆիկ է, բայց պատրաստ ենք։ Թիմի տրամադրվածությունը մարտական է, մթնոլորտը՝ հիանալի»,- ասել է Սպերցյանը։
Հայաստան-Լատվիա հանդիպումը կկայանա սեպտեմբերի 25-ին՝ ժամը 20։00-ին, Երևանի Վազգեն Սարգսյանի անվան «Հանրապետական» մարզադաշտում։ Սա Ազգերի լիգայի 2026/27 մրցաշրջանի C2 խմբի առաջին տուրն է։
