Անցեալ կիրակի, առաւօտեան կանուխ ժամերուն, Հայկական բարեգործական ընդհանուր միութեան Լիբանանի ընտանիքը անսաց միութեան համաշխարհային կոչին եւ իր բաժին ներդրումը ունեցաւ Հայաստանի մէջ արցախցի երեխաներուն անվճար ժամանց տրամադրող «Նայիրի ճամբար»-ին աջակցելու գործին մէջ: Հայաստանի եւ սփիւռքահայ համայնքներու նման լիբանանահայերը եւս իրենց նպաստը բերին` մասնակցելով «Համաշխարհային վազք` յանուն Նայիրի ճամբարին» խորագրեալ զուարճալի ձեռնարկին, որ տեղի ունեցաւ Մարինա Տըպպայէի մէջ:
Շուրջ 250 մասնակիցներ եկան իրենց երեխաներուն ընկերակցութեամբ եւ շուրջ երկու ժամ շարունակ ուրախ մթնոլորտ ստեղծեցին: Իրենց կարգին վազելու եկած էին ՀԲԸՄ-ի Լիբանանի Շրջանային յանձնաժողովի անդամներ, Կրթական յանձնախումբէն, Կեդրոնական վարչութենէն, Տիկնանց համախումբի եւ ՀԲԸՄ-ի վարժարաններու շրջանաւարտներու համախմբումի անդամներ:
Հինգ քիլոմեթր երկարող երթուղիի հիմնական նախապատրաստութիւնները արդէն իսկ կատարուած էին նախորդող շաբաթներուն` համագործակցելով Նագգաշի եւ Տըպպայէի քաղաքապետութիւններուն հետ, ինչպէս նաեւ Լիբանանեան բանակի, ներքին ապահովութեան ուժերու, քաղաքացիական անվտանգութեան ծառայութեան եւ Լիբանանի Կարմիր խաչին հետ, որոնք երաշխաւորեցին ձեռնարկին եւ մասնակիցներուն ապահովութիւնը:
Պէտք է նշել, որ «Նայիրի ճամբար»-ը Հանքաւանի մէջ 2021-ին Հայկական բարեգործական ընդհանուր միութեան հիմնած անվճար հաւաքավայրն է, ուր երեխաներուն համար կը կազմակերպուին զուարճալի ժամանց եւ դասընթացքներ: 2020-ի Արցախեան 44-օրեայ պատերազմին փորձառութիւնը վերապրած երեխաներուն ապաքինումը խթանելու համար հիմնուած ճամբարը աւելի ուշ սկսած է նաեւ ամէնամսեայ երկօրեայ հաւաքներ առաջարկել երեխաներուն, ի տես Արցախի բռնի տեղահանումէն ետք Հայաստան ապաստանած քաղաքացիներու կարիքներու աճին: