Հայաստանի Հանրապետության վարչապետ Նիկոլ Փաշինյանը մոտ ապագայում աշխատանքային այցով կմեկնի Թուրքմենստան։ Այս մասին հայտնել է Աշխաբադում Հայաստանի դեսպան Արսեն Ավագյանը՝ հանրապետության անկախության 35-ամյակին նվիրված ընդունելության ժամանակ։
Նրա խոսքով՝ այցը լրացուցիչ հնարավորություններ կստեղծի երկու երկրների միջև քաղաքական երկխոսությունը շարունակելու և գործնական համագործակցությունը զարգացնելու համար։
Սպասվում է նաև Թուրքմենստանի նախագահ Սերդար Բերդիմուհամեդովի պատասխան այցը Երևան, որը կհամընկնի 2026 թվականին Հայաստանում կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովի (COP17) հետ։
Դիվանագետը նշել է, որ վերջին տարիներին նկատելիորեն ակտիվացել է հայ-թուրքմենական քաղաքական երկխոսությունը։ Որպես դրա ակնառու վկայություն՝ նա մատնանշել է Հայաստանի նախագահ Վահագն Խաչատուրյանի երեք այցերը Թուրքմենստան՝ 2024 թվականի հոկտեմբերին, 2025 թվականի օգոստոսին և դեկտեմբերին։ Դեկտեմբերյան աշխատանքային այցի ընթացքում Խաչատուրյանը հանդիպել է Սերդար Բերդիմուհամեդովի հետ. կողմերը քննարկել են քաղաքական, տնտեսական, կրթական և մշակութային համագործակցության հետագա զարգացման, ինչպես նաև պատմամշակութային ժառանգության պահպանման, էներգետիկայի և կապի ոլորտներում փոխգործակցության ընդլայնման և ենթակառուցվածքների զարգացման հարցեր։
Աշխաբադի «Յիլդիզ» հյուրանոցում տեղի է ունեցել Հայաստանի Հանրապետության անկախության 35-ամյակին նվիրված ընդունելություն։ Միջոցառմանը մասնակցել են Թուրքմենստանի նախարարների կաբինետի նախագահի տեղակալ Գուվանչ Աղաջանովը, դիվանագիտական կորպուսի, ինչպես նաև գիտական, հասարակական և գործարար շրջանակների ներկայացուցիչներ և Թուրքմենստանում բնակվող հայ հայրենակիցներ։