Շրջակա միջավայրի նախարար Համբարձում Մաթևոսյանը հանդիպել է Կոլումբիայի շրջակա միջավայրի տարածքային կառավարման փոխնախարար Դավիդ Օլարտե Ամայայի հետ։ Այս մասին նախարարը գրել է Գեյսբուքի իր էջում:
«Քննարկել ենք COP16 և COP17 նախագահությունների տեսլականների միջև շարունակականության ապահովմանն ուղղված համագործակցությունը, ինչպես նաև Կունմինգ-Մոնրեալի գլոբալ կենսաբազմազանության շրջանակի իրականացման հետագա քայլերը։
Կարևորել եմ Կալիում ձևավորված առաջընթացի շարունակականությունը՝ հանձնառություններից անցում կատարելով կոնկրետ և չափելի արդյունքների։
Առանձնահատուկ անդրադարձել ենք Հայաստանի և Կոլումբիայի կողմից համատեղ մեկնարկած CARES՝ Վտանգված տեսակների վերականգնման գործողությունների կոալիցիա նախաձեռնությանը՝ որպես COP16 և COP17 նախագահությունների միջև գործնական համագործակցության կարևոր ուղղություն։
Քննարկել ենք նաև կենսաբազմազանության ֆինանսավորման, տեսակների և էկոհամակարգերի վերականգնման ու պահպանության ոլորտներում համագործակցության հնարավորությունները՝ կարևորելով Հայաստանի և Կոլումբիայի միջև երկարաժամկետ գործընկերության ամրապնդումը»,- գրել է նախարարը։