Շարունակվում է Հայաստանի երկրորդ նախագահ Ռոբերտ Քոչարյանի և նրա նախկին երեք բարձրաստիճան ենթակաների՝ Սեյրան Օհանյանի, Արմեն Գևորգյանի ու Յուրի Խաչատուրովի գործով դատավարությունը։
Նիստը նախագահում է դատավոր Սարգիս Պետրոսյանը։
Դատարանի բակում այսօր հավաքվել են Ռոբերտ Քոչարյանի աջակիցները։ Նիստի եկած երկրորդ նախագահը դիմել է նրանց՝ ասելով. «Ես ոնց-որ ձեզանից լավ եմ»։
2008-ի Մարտի 1-ի իրադարձություններին առնչվող այս գործով Քոչարյանն ու նրա երեք նախկին ենթակաները նախկինում մեղադրվում էին սահմանադրական կարգը տապալելու համար։ 2021-ին, սակայն, Սահմանադրական դատարանը հակասահմանադրական ճանաչեց մեղադրանքի հիմքում դրված հոդվածը, և նրանց նկատմամբ քրեական հետապնդումը դադարեցվեց։
Անցած տարի գործը վերաբացվեց արդեն այլ հոդվածով։ Դատախազությունն այժմ նրանց մեղադրում է պաշտոնեական լիազորություններն անցնելու և ազդեցությունը չարաշահելու համար։ Քոչարյանն ու մյուս մեղադրյալները մեղադրանքը չեն ընդունում։
Մարտի 1-ի իրադարձությունների հետևանքով տասը մարդ էր զոհվել, մինչ օրս որևէ մեկը պատասխանատվության չի ենթարկվել։