Սեպտեմբերի 26-ից հոկտեմբերի 8-ը Երեւանում կանցկացվի «Կոմիտաս» միջազգային փառատոնը՝ նվիրված հայ կոմպոզիտորական դպրոցի հիմնադիր, երաժշտագետ, բանահավաք, երգիչ եւ մանկավարժ Կոմիտաս Վարդապետի հիշատակին ու ստեղծագործական ժառանգությանը։
Փառատոնը կանցկացվի Կոմիտասի ծննդյան նոր եւ հին տոմարներով նշվող ամսաթվերի միջեւ։
«Կոմիտաս» միջազգային փառատոնը համադրում է Կոմիտասի ժառանգության տարբեր շերտերը՝ երաժշտական ստեղծագործությունը, գիտական եւ գրական ժառանգությունը, կերպարվեստը, թատերական ընթերցումները, ինչպես նաեւ նրա կյանքի ու գործունեությանն առնչվող նյութերի պահպանումն ու հանրայնացումը։
Փառատոնի ծրագիրը միտված է Կոմիտասի ժառանգությունը ոչ միայն ներկայացնելուն, այլեւ այն ժամանակակից մշակութային երկխոսության մեջ ներառելուն՝ տարբեր արվեստագետների, հետազոտողների եւ մշակութային կառույցների մասնակցությամբ։